Fekk fanga den myteomspunne fuglen. Nå skal dei fylgje med på korleis den lever livet sitt

– Dobbeltbekkasin er ein myteomspunne fugl, seier Frode Falkenberg som er seniorrådgjevar i Birdlife Noreg. 

Han fortel at fuglen var vanlegare før, men at ein nå må til fjells for å sjå den. I Europa er bestandane nesten forsvunne. Og i Noreg er arten nær trua.

Førre helg var Falkenberg på Hardangervidda for å leite etter dobbeltbekkasin. Målet var å ringmerke fuglar for å samle meir informasjon om arten.

550 mil i ein jafs

Forskaren veit kor han skal leite. Dobbeltbekkasinen trivst best i fjellet, i rike bakkemyrar som er vendt mot sør.

– Ofte slike plassar der snøen går først på våren, fortel Falkenberg.

På vinteren er dobbeltbekkasinen i Afrika, men i mai flyg den tilbake til Noreg.

– Og den tek gjerne heile trekket i ei etappe, fortel Falkenberg.

Før den reiser et den seg godt opp slik at den skal klare heile turen utan stans. Så flyg den 550 mil i ein jafs, på 64 timar. Det vil seie ein gjennomsnittsfart på 90 kilometer i timen. 

Vel framme i Noreg er det klart for leik. For dobbeltbekkasin er ein leikart på same måte som tiur og orrfugl. Kvar vår samlar hannane seg på nøyaktig den same staden, gjerne i eit vierkratt, som dei har gjort i fleire hundre år. 

Og i år fekk Falkenberg filma dobbeltbekkasinleiken.

Dobbeltbekkasinleik på Hardangevidda filma av Frode Falkenberg.

Merka fugl

Saman med ein kollega fekk han også fanga ein dobbeltbekkasin, i eit spesialdesigna nett. Så merka dei den med ein metallring og utstyrte den med ein satellittsendar. Totalt har forskarane nå fanga tre hannar som flyg rundt i Øvre Telemark. 

– Og nå følgjer me med kvar dag når me får dataleveranse frå satellitten, fortel Falkenberg. 

Målet er å få meir kunnskap om arten.

– For det er mykje me ikkje veit, seier forskaren.

Han meiner blant anna det er viktig å få kartlagt leikplassane. For mange av desse ligg i område som også kan vere interessante for dei som ynskjer seg hytte i fjellheimen. 

– Det har nok ryke ein del leikplassar for dobbeltbekkasin på hytteutbygging, seier han.

Forskaren meiner at naturen i fjellet er langt meir sårbar enn den ved kysten. Og han ser at det er ein nedgang i fleire fugleartar på Hardangervidda. Falkenberg meiner det er fleire årsaker til det, han nemner klimaendringar, nedgang i insekt og nedbygging av natur.

Den lokale Birdlife-organisasjonen hadde også samla seg til fuglehelg den same helga. Dei fekk blant anna høyre foredrag og var også ute for å registrere fugleartar, både på Hardangervidda, og i områda rundt Rauland og Møsvatn.

– Og til saman registrerte me nå 60 ulike artar, fortel leiaren av Indre Telemark Birdlife, Kjell Bitustøyl. 

Les også:

Dei siste åra har Kjell sett ei endring. – Fleire fugleartar har forsvunne