«Det kom ein påskekylling innom, og han hoppa over gjerdet»
Sanitetslaget i Vrådal held tradisjonen varm og kom med påskefrukost til små og store i Straumsnes barnehage, og jammen hadde ein annan påskegjest vore innom også.
Denne fredagsmorgonen hadde Solveig Nekstad Grave og Liv Aasheim fylt rikelege fat med egg, grønsaker, gode pålegg og rundstykke for å samle alle til påskefrukost slik Vrådal sanitetslag har gjort i barnehagen i ei årrekke.
Denne våren er det 12 barn i barnehagen, til hausten blir dei 14.
Artikkelen held fram under annonsen.
– Det er gledeleg at det har blitt så mange barn her. Hausten 2021 var det tre barn nokre av dagane i veka, nå ser me ei positiv utvikling, seier barnehagestyrar Ingvild Skipar.
Ho fortel at det er rikeleg med plass i barnehagen på Straumsnes.
På fanget har ho Wiel Svalestuen Lønnegraff og Ingrid Straand Skarprud som fortel at dei har teikna påskeduk, laga påskekyllingar og bilete før foreldra skulle kome på besøk denne siste barnehagedagen før ferien.
Spretten kylling
Dagen før hadde det også vore eit spennande besøk i barnehagen.
– Det kom ein kjempestor påskekylling ute, me såg han frå glaset, forklarar Ingrid.
Wiel og Ingrid seier påskegjesten hadde med eit påskeegg. Dei måtte ut for å leite etter det.
– Påskekyllingen hoppa over gjerdet, eg rakk ikkje å sjå fjeset hans eingong, seier Ingrid alvorleg.
– Men me fann eit egg med godteri, og sjokolade, seier jentene og smiler nøgd.
Artikkelen held fram under annonsen.
Høner på lån
Foreldrerepresentantane Tone Øy og Tone Straand skildrar ein barnehage med godt samarbeid mellom tilsette og alle i foreldregruppa. Og dei rosar barnehagen for å bruke nærområdet mykje til tur og aktivitetar.
– Alle er positive og me har eit godt samhald. Me har ei samansveisa barnegruppe på tvers av aldrar, og dei tilsette er flinke til å inkludere nye barn i gruppa, seier Straand som sjølv gjekk i barnehagen på Straumsnes då ho var lita.
Ho seier at idear som blir spela inn blir godt motteke.
– Nå har me bygd hønsehus på dugnad, og til våren kjem det høns som barnehagen skal få låne ei stund.
– Det er så fint å sjå at tilveksten i barnehagen har vore så god, og det var fint å vitje politikarane i Kviteseid i fjor haust og takke dei for at dei valte å satse på barnehagen vår, seier Straand.
