Den kjende seljordskunstnaren Knut Flatin er død

Knut Flatin vart fødd 7. juli 1945, og døydde 11. februar etter nokre veker med sjukdom. Foreldra hans var Anna (fødd Nordskog) frå Morgedal og Eivind K. Flatin frå Nordbygdi i Seljord. Kunstnaren var oppvaksen og busett på Ramberg i Seljord, like ved kommunegrensa til Kviteseid, med kona Anne Brit Borgen.

Debuterte 22 år gamal

Flatin debuterte i 1967 med ei teikning på Statens haustutstilling, fortalde han til Vest-Telemark blad for nokre år sidan. Av intervjuet gjekk det også fram at han i ungdomen var i lære hjå Terje Grøstad i Flatdal, og at han var assistent for Dagfin Werenskiold, og seinare Halvdan Ljøsne. Det var under Ljøsne si rettleiing at Knut Flatin forlét det figurative måleriet og vidareutvikla forma si mot eit nonfigurativt språk.