Den erfarne jegeren handla i beste meining då han slo i hel ei hardt skadd gaupe

Den erfarne jegeren og tidlegare bonden Kjetil Aalandslid slo i hel ei gaupe som var hardt skadd og forlaten i vegkanten på E134 i bakkane opp mot avkøyrsla til Åsgrend. Nå er han meldt til politiet. – Eg reagerte som ein dyrehaldar, og gjorde det i beste meining, fortel Aalandslid.

Natt til sundag skulle Aalandslid som bur i Høydalsmo køyre nokre hundre meter frå huset sitt til busshaldeplassen langs europavegen. Han hadde besøk frå Tyskland som skulle ta bussen til Gardermoen. Bussen kom ikkje, og det viste seg at det ikkje går nattbuss natt til sundag.

– Derfor køyrde eg til Kongsberg så ho kunne ta toget, fortel Aalandslid.

Sidan han i utgangspunktet berre skulle køyre nokre hundre meter frå huset var han berre i tøflane då han køyrde av garde. På heimveg kom han på at han hadde gløymt å låse døra. Då var Aalandslid i Seljord. Det snødde tett, vegane var ikkje brøytt og klokka var rundt halv ni om morgonen.

– Då eg køyrde opp bakkane til Åsgrend og i svingen der eg ser opp til avkøyrsla inn til Åsgrend, ser eg ein grå dott i vegkanten.

Aalandslid har vore meir i skogen enn dei fleste. Han har vore på jakt sidan han var liten gut, og er framleis ein aktiv jeger. Han fekk fort mistanke om at det var ei gaupe han hadde sett.

– Eg køyrde forbi, men snudde og køyrde tilbake, stansa bilen og sette naudblinken på. I bilen har eg ein jekk. Den henta eg og avliva dyret med, fortel Aalandslid og demonstrerer med ei rask rørsle med handa.

At dyret hadde det veldig vondt før han slo han slo henne i hel var han aldri i tvil om.

– Ho var heilt øydelagt, bakparten var knust, og ho slengde på hovudet. Det einaste eg var oppteken av då, var å ta livet av henne så ho ikkje skulle lide meir.

Eg reagerte som ein dyrehaldar, og gjorde det i beste meining.

Ville kome seg bort frå trafikken

Måndag skreiv VTB at ein bilførar hadde slått i hel og tatt med seg ei påkøyrd gaupe. Fleire andre har også omtalt saka.

– Eg tok med meg gaupa for å koma vekk frå den farlege situasjonen, seier Aalandslid.

Han stod parkert langs E134, det snødde, og fleire bilar kom til. Aalandslid fortel at det stod to bilar parkert i avkøyrsla inn til Åsgrend, og han snakka med ein av personane.

– Eg spurde om det var ho som hadde køyrd på gaupa, men det var det ikkje sa ho. Men ho hadde varsla politiet. Det var bra, tenkte eg, for då slepp eg å gjere det. Etterpå kom det 6–7 andre bilar til, og alle sa at det var rett det eg hadde gjort, og at det var ei human avliving, seier Aalandslid.

I bilen hadde han ein rull med søppelsekkar liggande, han tok ein pose, la dyret bak i bilen og køyrde heimover. I tillegg til å kome seg bort frå den potensielle farlege trafikksituasjonen, ville han raskt heim til huset som stod ulåst.

Han ringde sonen, Olav, så han kunne varsle viltnemnda. Olav var ikkje sikker på kven som er i viltnemnda i Kviteseid kommune og ringde derfor til Magne Skarprud som er miljø- og utmarkskonsulent i Kviteseid. Klokka var nokre minutt over ni sundags morgonen, og Skarprud tok ikkje telefonen. Derfor ringde Olav vidare til politiet. Dei snakka nokre minutt og han gav all informasjon han hadde til politiet.

Viltnemnda henta gaupa heime hos Aalandslid, og jegeren fortel at det aldri var hans intensjon å behalde gaupa.

Eg var fem år fyrste gong eg var på med på jakt, og har tatt livet av all slags dyr. Eg har vore formann i Tokke dyrevernsnemnd og halde kurs i slakting. Eg trur eg har litt peiling.

– Eg handla i beste meining

– Eg var fem år fyrste gong eg var på med på jakt, og har tatt livet av all slags dyr. Eg har vore formann i Tokke dyrevernsnemnd og halde kurs i slakting. Eg trur eg har litt peiling, seier Aalandslid.

Ifølge Varden har Statens naturoppsyn (SNO) nå meldt saka til politiet. Det har jegeren fått høyre frå andre. Sjølv har han ikkje høyrt noko frå SNO.

– Eg synest det er merkeleg. Eg har lært at ein skal behandle dyra skikkeleg, og at dei ikkje skal lide noko ekstra, seier jegeren.

– Om det skulle skje igjen; kva ville du då gjort?

– Då har eg tunnelsyn og let som eg ikkje ser noko, svarar han før han tenker seg litt om.

– Men når eg kom heim, då ville eg hatt det på samvitet. Nå har eg det beste samvitet for dette dyret, legg han til.