Då foreldra kjøpte det gamle hotellet bestemte borna seg for at dei ville opne bakeri
Denne sommaren har det igjen vorer mogleg å kjøpe ferske bakarvarer på Malenes hotell. Bak det sommaropne konseptet står ein ung gjeng.
Publisert
Det er kø utanfor Malenes hotell i Treungen, og lukta av nybakt gjærbakst siv ut på fortauet. På disken ligg nybakte kanelknutar, rykande ferske wienerbrød, sjokoladekjeks og vaflar. Bak disken står to elleve år gamle jenter i gule forklede. Dei tilbyr også kuleis og kald drikke i sommarvarmen.
Gamalt bakeri
Det er ein ung gjeng som står bak det sommaropne bakeriet i Treungen. Éin av dei er 15 år gamle Jonas Weholt Lilløy.
I november kjøpte foreldra hans det gamle hotellet i Treungen. Dei tre borna i familien hadde høyrt at det tidlegare hadde vore bakeri i kjellaren der, og den gamle omnen stod der framleis.
– Så me tenkte; kvifor ikkje bruke den, seier Jonas.
Ideen om at borna i familien kunne ha sommarjobb med å selje bakarvarer frå kjellaren hadde dei klekt ut før foreldra bestemte seg for å kjøpe hotellet.
Annonse
Dei fekk med seg fleire vener, og då VTB var innom, var sju personar i sving med å selje ferske bakarvarer i kjellarlokalet på det hundre år gamle hotellet.
Tidlege morgonar
Jonas og kameraten Liam har hatt ansvaret for kanelknutane. Deigen set dei om kvelden, så kaldhevar den gjennom natta, før dei bakar ut knutane på morgonen.
– Denne dagen har me baka 120 kanelknutar,fortel dei.
Og etter knapt to timar er alle utselde.
13 år gamle Ludvig Weholt Lilløy har vore tidleg oppe og hatt ansvar for wienerbrøda. Denne dagen er også kameraten Jone Tobias på besøk. Han har hjelpt til med bakinga. Og wienerbrøda dei to har baka er glutenfrie.
Yngstejenta i familien, 11 år gamle Ylva, har fått med seg nabojenta Andrea Linn. Dei har baka sjokoladecookies denne sommaren, og i tillegg har dei stått bak disken i bakeriutsalet.
Frå naboen på Treungen gjestgiveri har dei fått låne både brusskåp og isdisk. Det gjer at dei også kan tilby kuleis og kald drikke.
Alt blir utselt
Annonse
Totalt har bakeriet hatt ope åtte dagar i sommar, og kvar dag har alle bakevarene blitt utselde.
– Når bakeriet har opna klokka 11, har kundane ofte stått utanfor og venta, fortel gjengen.
Både fastbuande, hyttefolk og andre turistar har nytta seg av tilbodet, og mange har også kome tilbake igjen for å handle. Det tek dei som eit godt teikn.
– Responsen har vore god, konkluderer Jonas.
Dette er siste veka bakeriutsalet har ope denne sommaren. Den unge gjengen er svært fornøgd med sesongen, og ser ikkje bort frå at det kan bli bakeriutsal også neste sommar.
