Chevreen skal tilbake til Berlin

Den store matmessa Grüne Woche i Berlin opnar i dag. Tine Chevre frå Haukeli blir utstilt i år òg.

Tre ulike variantar av chevre produsert på meieriet i Haukeli skal representere Noreg på den store, internasjonale matmessa i Berlin. 

Les også:Sølvmedalje til chevre frå Haukeli

Grüne Woche er ei av verdas største forbrukarmesser for landbruk, mat og reiseliv. Det er Landbruks- og matdepartementet som står bak Den Norske Paviljongen i nært samarbeid med Innovasjon Norge og ambassaden i Berlin. Fredag åpnar landbruks- og matminister Bård Hoksrud den norske standen, skriv meieriet i Haukeli i ei pressemelding. 

Internationale Grüne Woche (IGW) har blitt ein viktig profileringsarena og ein sentral møteplass for alle som arbeider i skjeringspunktet mellom mat, opplevingar og reiseliv. Noregs deltaking på IGW har som overordna mål å bidra til å utvikle Noreg som anerkjent mat- og reiselivsnasjon med tydeleg lokal og regional identitet.  

Det er fleire avdelingar på Den Norske Paviljongen. På Ostehjørnet finn du Norsk Gardsost og Tine. Sistnemnte deltek med eit breitt utval av ostar – deriblant chevre frå Haukeli – som vert presentert for eit internasjonalt publikum.