Starta sesongen med tre poeng og to raude kort
Det blei høg temperatur i sluttminuttane på Eventyrøy, men Seljord reid stormen av og kunne juble for tre poeng i serieopninga mot Siljan.
Trenar Øyvind Oland frykta det verste då Siljan utlikna til 1-1 rett etter at Seljord var redusert til ti mann og med ein halvtime att å spela. Men seljordingane slo tilbake, mellom anna med hjelp av ein tidlegare storskårar. Torbjørn Sigstad har passert 40, men viste at han framleis kan spela ei viktig brikke for Seljord i 6. divisjon. I laurdagens kamp erstatta han ein strekkskada Nicklas Signebøen i andre omgang. Det gav med ein gong Seljord trua på siger.
– Han fekk beskjed om å halde på ballen og prøve å spele gjennom vingane. Torbjørn viste god gamal klasse, er attesten frå trenar Oland.
Artikkelen held fram under annonsen.
Han såg Sigstad motta ein lang ball frå Olav Listaul. Veteranen tok den ned på brystet i duell med to Siljan-spelarar og blei felt av ein tredje. Olav Listaul var sikker frå straffemerket i det som blei den avgjerande 2-1-skåringa. Like etter kunne heimelaget punktert kampen. Sigstad la 4-5 motspelarar bak seg og serverte medspelarar framfor mål, men heimelaget klarte ikkje å omsette dobbeltsjansen i mål.
– Me viser ein strålande lagmoral og får valuta for at me tør å spele ball, seier Oland etter tre poeng mot Siljan.
Matjas Loftesnes sendte heimelaget i føringa i fyrste omgang etter pasning frå Olav Listaul.
Roar Slinde måtte tusle i garderoben etter to billige gule kort med 30 minuttar att å spela. På overtid måtte Bård Stian Rui ta den same vegen med direkte raudt kort frå dommaren etter at det blei litt ampert på Eventyrøy.
– Det er mogleg det er greitt med raudt kort, men då burde også Siljan-spelaren hatt det, meiner Oland om situasjonen.
– Det er dumt at det blei ampert på slutten, men me er strålande fornøgde med siger i serieopninga, legg han til.
Junioren Ottar Barstad Slinde blei kåra til banens beste. Han var solid i midtforsvaret saman med far Roar.
Neste kamp er heime på Eventyrøy mot Gulset 17. april. Skienslaget blir trena av fyresdølen Øyvind Haugen, og Oland trur Gulset er ein opprykkskandidat frå 6. divisjon.
