Rådmannen overtek næringsarbeidet
Når næringssjefen i Fyresdal sluttar til våren er det rådmannen som får ansvaret for næringsarbeidet.
Næringssjef i Fyresdal, Edvard Nesland, har sagt opp stillinga si og sluttar i jobben 1. mai for å gå over i AFP (avtalefesta pensjon). Stillinga var ei tid på 100 prosent, men dei siste åra har Nesland etter eige ynske hatt oppgåva i 80 prosent stilling. Han har hatt stillinga i nesten ti år.
I formannskapet nyleg valde politikarane å trekke inn heimelen som næringssjef, og å leggje ansvaret for næringsarbeidet til rådmannen.
Artikkelen held fram under annonsen.
Omstillingsarbeid
Utanom eige vanleg kommunalt næringsarbeid, er Fyresdal peika ut som omstillingskommune og skal arbeide for å få 40 nye arbeidsplassar innan utgangen av 2022.
Over ein seksårsperiode kan midlane til omstillingsarbeidet i Fyresdal kome opp i ein sum på 14 millionar kroner. Av statlege midlar vidaresendte Telemark fylkeskommune i fjor 1,6 millionar kroner til omstillingsprosjektet. Dei neste fem åra kan det kome ytterlegare 10 millionar statlege kroner.
Kommunen må ut med sin del for å få løyst ut dei statlege pengane, og kan måtta løyve totalt 2,5 millionar kroner til satsinga i seksårsperioden.
I samband med prosjektsatsinga er det tilsett ein dagleg leiar i 100 prosent stilling, betalt av omstillingsmidlane.