Skodespelar Nils Sletta er død. Her er han i 2008 då han tok imot Gullruten for beste mannlege skodespelar for rolla si i NRK-serien Berlinerpoplene.Foto: Tor Erik H. Mathiesen / NTB / NPK

Skodespelar Nils Sletta er død

Skodespelar Nils Sletta døydde natt til torsdag, 77 år gammal.

Sletta har spelt ei rekkje leiande roller og vore knytt til både Riksteatret og Det Norske Teatret.

Det er sonen til Sletta, Torbjørn Sletta Jacobsen som i eit Facebook-innlegg fortel at faren er død, skriv Telemarksavisa.

– Den kjære pappaen vår orka ikkje meir, og sovna inn i natt. Han var ikkje redd for det som skulle skje, det fortalde han meg ein av dei siste dagane. Det var ei god trøyst. Tov, Ragnhild og eg var hos han den siste stunda, slik han ønskte, og slik vi ønskte, skriv Torbjørn Sletta Jacobsen.

Sletta vart fødd 23. april 1943 i Tuddal i Hjartdal. Gjennom fleire tiår var han kjend som skodespelar og spelemann. Sletta debuterte på Riksteatret i 1965 og har spelt ved Trøndelag Teater og vore fast tilsett ved Det Norske Teatret sidan 1969.

Han hadde roller som Peer Gynt, Ivar Aasen i Tusen fjordar, tusen fjell, Bellest i Vestavind, tittelrolla i Barabas og Alfred i Karsten og Petra på skattejakt. Sletta fekk i 1997 Kritikarprisen for rolla som Mattis i Fuglane.

(©NPK)