Vil investere 540 millionar kroner i solkraftverk. – Eg har problem med å sjå ulempene

Nissedal formannskap har hatt besøk av Å Energi som ynskjer å investere i 12 solkraftområde sør i Nissedal kommune. Produsert straum frå solkraftanlegget kan dekke årsforbruket til i overkant av 7 000 husstandar, ifylgje selskapet. Anlegget er ei monaleg stor investering – vil koste ganske mange hundre millionar kroner.

Nyleg vitja Pyur Energy formannskapet for å fortelje om sine planar i kommunen – Gaukår i sør og Borstad på Fjone.

– Det er veldig miljøvenleg å produsere straum frå sol. Pyur Energy siktar mot å bli ein leiande kraftprodusent i Norden, og er ikkje den einaste som gjer det. Me har 55 prosjekt under utvikling. To av dei er Gaukås og Borstad, der planen er at solcelleanlegga er sett i verk innan tre år. Me må ha konsesjon og tilgang til nett, og det tek tid. Og så må prosjekta vere noko kommunen stiller seg bak, sa Christopher Kjølner i Pyur Energy, og la til at det kan vere at dette selskapet og Å Energi finn saman om å ha eitt prosjekt, utan at det førebels er avklart.