Pass på! Kjeltring etter kjeltring vil lure pengar frå meg – og deg

Dessverre blir det bare fleire og fleire rundt i verda som prøvar å lure pengar frå meg og sikkert mange titusenvis andre norske personar årleg.

Det er ikkje lenge sidan eg fekk ein telefon frå ei med svensk stemme om at eg måtte betale 299 kroner i toll for ei pakke som skulle til meg. Blei ikkje summen betalt, ville frakta av pakka bli stoppa. Då la eg på straks, for eg visste at dette var kjeltringstrek – og eg venta ikkje nokon pakke frå utlandet. Eg sjekka nummeret på den som ringde, og det tilhøyrde nokon i Trøndelag – eit nummer som kjeltringen altså hadde klart å bruke, slik det skjer ikkje sjeldan frå dei som skal prøve å tilrøve seg andres pengar.

I førre veke fekk eg telefon frå: «Skjult nummer, ukjent». Slike telefonar tek eg ikkje. Den i andre enden kom til mobilsvaren min. Eg fann ut eg skulle høyre på kva som blei sagt der. Det var ikkje ein person som prata, men ei «maskin» med standardord som nok mange har fått høyre: «Hei. Dette er en automatisk melding fra Klarna. Vi har mottatt en kjøpsforespørsel på 299 euro, og det samme vil bli trukket fra kontoen din. Viss du vil kansellere dette, trykk 1, eller for å kreve refusjon, trykk 2, eller for å snakke med representanten vår, trykk deretter 9.»