Hauglandsmyri

Det har vore mykje merksemd og mange spørsmål omkring Hauglandsmyri i Brunkeberg som kommunen opparbeider til næringsareal. Det handlar om fleire tema, m.a. ein over 43 år gamal reguleringsplan, utgraving av myr, korleis prosjektet blir gjennomført, kostnader og bruk av området.

Planen og anbodet gjekk ut på å opparbeide ca. 11 da. Det skulle bli teke ut lausmasser til ca. 1 m under terreng i gjennomsnitt, og så bli fylt på 1,5 m stein. Så viste det seg at myra var djupare enn 1 m. Den steinen ein trong då, førte til at det utfylte arealet blei tilsvarande redusert i utstrekning. Sjå kommunen si heimeside, stikkord Hellebroi, publisert 26.4.2024.

No nyleg fekk VTB opplyst frå kommunen at det utfylte arealet var blitt mellom 4 og 5 da. VTB nett 12.12.2025. Det utgjer rundt rekna 40% av det planlagte og utlyste. Det vil seie at prosjektet har hatt ein formidabel prisauke i høve til det som var føresetnaden. I realiteten er dette også ei dramatisk budsjettoverskriding. For sjølv om summen som blir betalt ut no, er etter budsjettet, må det nye millionar til for å få gjort 11 da ferdig. Om ikkje området blir vidare opparbeidd, blir også framføring av vatn og avløp m.m. tilsvarande dyrare pr. da eller pr. etablert verksemd.