VTB 50 år — Sjå bilete og video frå jubileumsfesten

Laurdag vart lokalavisa feira på Straand hotell i Vrådal.

– Dette er ein utopi som har blitt til sanning, sa Halvor Øygarden frå Vinje.

Han var den fyrste styreleiaren i Vest-Telemark Blad og fortalde om korleis ein bitter EU kamp i 1972, der neisida ikkje kom til orde i fylkesavisene, førte til eit opprør.

Sigrid Straand og Bjørn Bø fortalde også om korleis ideen om ei eige avis for Vest-Telemark voks fram. Dei var på denne tida studentar.

Regionsordførar Tarjei Draugedal helsa frå ordførarane i Vest-Telemark. Og journalist Geir Ufs fortalde korleis han starta opp med å skrive referat frå fotballkampar og enda opp som fast journalist i lokalavisa.

Jubileumslåt

Symre Taugbøl Bang har i fleire år vore ferievikar i VTB, men studerer til dagleg på musikkhøgskulen i Oslo. Det var under årets sommarjobb at ideen om ei jubileumslåt vart klekt ut. I låten har alle kommunane fått kvart sitt vers.

I Vrådal hadde ho tromma saman eit band med andre unge vesttelar: Auver Gaaren, Tov Espelid og Jon Espelid.

– Mi favorittlåt, sa ein fornøgd redaktør Øygarden etter framføringa.

Med på festen var også E-76, som spelte gamle slagerar.