Vil tenne folkemusikk-gnisten hos ungane att

Det var eit yrande folkemusikkliv blant ungane i Seljord for nokre år sidan, og dei var flinke også.

I 2008 vann Seljord juniorspelemannslag klassa si på landskappleiken i Oppdal. Tre år seinare var Seljord vertskap for Landskappleiken. Då dansa mellom førti og femti barn frå Tusseleiken på opningsframsyninga, og talet på hardingfeleelevar i kulturskulen var oppe i tretti.

I det siste har den folkemusikalske rekrutteringa Seljord kome ned i ein bølgedal. Nå er det ingen ungar under ungdomsskulealder som tek hardingfeletimar i kulturskulen, og i juniorspelemannslaget er det berre med éin. I tillegg har Tusseleiken lege på is heilt sidan koronaen.