Stine var den fyrste representanten på kyrkjemøtet frå Telemark sidan 1995. – Alle skal føle seg vel i kyrkja

I fjor haust vart Stine Beate valt inn i Agder og Telemark Bispedømmeråd. Ho stod på lista til Open Folkekyrkje, og kan bli definert som kyrkjepolitikar. Tidlegare var ho tilsett i kyrkja i Vest-Telemark, der ho laga planar for trusopplæringa for til saman ni sokneråd i Kviteseid, Nissedal, Vinje, Tokke og Fyresdal. Ho er utdanna lærar og er i dag rektor i kulturskulen i Vinje.

– Programmet til Open Folkekyrke passa meg bra. Dei kjempar for at mange grupper som har blitt avvist av kyrkja tidlegare skal få ein plass der. Som homofile, lesbiske, bifile og transpersonar – det er noko eg og brenn for, seier Stine Beate.

VTB treffer Stine Beate på Kakeringen i Åmot for å snakke om kyrkjemøtet og hennar tankar om kyrkja. Ho voks opp i eit kristent miljø og byrja tidleg å arbeide frivillig i kyrkja, som dirigent og danseleiar for det lokale tensingkoret. Dette miljøet i oppveksten hugsar ho som trygt og godt – og som ope og tolerant for ulikskapar.