Håkon er ein musikalsk verdsborgar – skal ta med festivalgjestene på ei togreise. – Ein god porsjon ekstra sommarfuglar i magen

Arrangørane skildrar Aase som «fostra opp på tradisjonsmusikken frå Telemark og andre musikkformer i ein musikalsk familie». Trass ung alder har han gjort seg merkt med eminent og eigenarta felespel, kyter arrangørane vidare i programmet for Telemarkfestivalen.

Sjølv fortel Aase at han fyrst starta å spele piano og trommer på barneskulen, før han på ungdomsskulen vart begeistra for klassisk musikk – spesielt fiolinverka til Vivaldi og Bach. Sidan då har han fylt på med monaleg musikalsk fagleg påfyll, fyrst på musikklina i Skien, så eit år på jazzlina på Sund folkehøgskule i Trøndelag og til slutt fire år på musikkhøgskulen i Oslo.

Medan han studerte byrja han å turnere utanlands med Mathias Eick kvintett og Thomas Strønen sitt ensemble «Time is a Blind Guide». Og etter fleire år med speling i ulike jazzkonstellasjonar har han i seinare tid blitt med i Odd Nordstoga sitt band og «Heimafrå»-prosjektet til Odd og Ingebjørg Bratland, som spelar på Telemarksfestivalen laurdag.