Gjev eit glimt inn i kulissane til bygdefenomenet: Hamna i Se og Hør til tittelen «Slaktet seg selv»

Nå har tekstforfattaren, gitaristen og vokalisten skrive boka om historia til bandet som stadig fyller samfunnshus med ein ny generasjon som syng med. «Det er like moro kvar gong!» er helsinga frå Loftsgarden til det trufaste publikumet. I den vesle boka som nå er ute, lovar han at siste song ikkje er sunge – «og kven veit; kanskje kjem det ei ny plate som me sjølvsagt trur kjem til å gjere oss berømte over heile kongeriket».

Det starta som ein duo på midten av åttitalet. Georg Hagen og Knut Martin Edland var E-76 Street band. Med Loftsgarden på el-gitar blei dei ein trio, men dei sakna ein levande trommeslager (som erstatning for trommemaskina på orgelet til Knut Martin). Han fann dei på Dalen.

«Han hadde eg spela saman med i legendariske «Nystogs», og han ville med sitt gode humør og ingenting er umogleg-innstilling, passe perfekt inn som fjerdemann på laget», skriv Loftsgarden.