Snart klart for sommar, skulefri og Sommarles
For elevane på Høydalsmo skule handlar sommaren om meir enn å bade og gå i shorts – frå 1. juni til 30. august blir leselysten deira premiert.
På tysdag samla alle elevane frå 1.-7. klasse på Høydalsmo skule seg i matsalen. Elin Normann frå Tokke folkebibliotek kom på besøk for å informere om Sommarles-prosjektet. Ho hadde med videohelsing frå statsministeren og kronprinsesse Mette-Marit som oppfordra alle elevane til å lese masse i sommar.
I tillegg fekk elevane i heile Tokke ein eigen helsing frå kampanjeleiinga fordi dei gjennom fleire år har vore veldig flinke i Sommarles.
Artikkelen held fram under annonsen.
Sommarles er ein nasjonal, digital lesekampanje for alle ungar frå 1.–7. klasse. Meininga med kampanjen er å få motivasjon til å lese om sommaren. Ungane lagar ein konto der dei registrerer alt dei les, går opp i nivå, får digitale trofé og ikkje minst fysiske premiar som ein hentar på biblioteket i sin kommune. Dei får like mykje poeng for å lese sjølv, bli lest for og for å høyre på lydbok.
Elevane får premie for å nå nivåa 10, 20 og 30.
– Blir det premie for nivå 40 også?, spør Jens Lundevall-Bleikelia.
– Kanskje, me jobbar med ei overrasking, fortel bibliotekaren.
– I fjor kom eg på nivå 41, legg Jens til fornøgd.
– Ja, det veit eg, eg hugsar det, svarar Nordmann.
Sommarles startar 1. juni og sluttar 30. august. Biblioteket i Høydalsmo er ope kvar tysdag, men det stenger når skulen tek ferie.
Nordmann fortel at elevane då kan besøke biblioteket på Dalen, og i tillegg kjem dei til å opne eit eiget sommarbibliotek i sentrum. Dei har fått eit tilskot av Nasjonalbiblioteket på 70 000 kroner, og planen er å opne 16. juni, samstundes med Dalsmarken.
Artikkelen held fram under annonsen.
– Det blir i lokala der Nova har vore, og her blir det litt ekstra fokus på Sommarles, seier ho.
Elevane stortrivst på biblioteket
6.-klassingen Marthe Rui Nestestog, 5.-klassingane Raminta Trapikaite og Emil Solbu Rydland, og Jens Lundevall-Bleikelia og Theodor Gullseth Skogsrød frå 3. klasse har alle deltatt i Sommarles før og brukar biblioteket på skulen mykje.
Dei fortel at dei les meir om sommaren enn elles i året.
– Når eg køyrer bil likar eg best og slappe av å høyre på lydbok, og når eg er ute kan eg sole meg og lesa samtidig, fortel Marthe.
– Det er avslappande å lese i sommarferien, då ein ikkje har så mykje ana å gjera, syntest Emil.
Emil meiner at premiane ikkje har så mykje å seie, det er moro å lese uansett. Medan Theodor er veldig interessert i å vinne ei haitann, som er ein av premiane. Det var visst veldig inn med desse haitennene.
Medan Emil anbefaler Verdens verste-serien legg Theodor raskt til at forfattaren Percy Jackson er ein av hans favorittar.
– Eg likar å lesa fantasy og teikneserie, og nokre bøker på engelsk, fortsett Marthe.
Artikkelen held fram under annonsen.
– Eg synest det er gøy å lese bøkar når det er ein serie, legg Jens til.
Ein annan viktig del av Sommarles er at det kvar veke kjem eit nytt kapittel i historia om Astrid og Asbjørn. Historia kan elevane lese eller høyre på lydbok. For fyrste gong er den lese inn på nynorsk.
– Kva synest de om det?
– Det er bra!
– Kva vil de seie til nokon som ikkje har vore med på Sommarles før?
– Bli med på Sommarles, seier Jens gira.
– Heng deg på!, legg raskt Emil til.