Bratsberg-elev stiller ut i Vrådal

I helga opna utstillinga «Natur & mangfold» i Galleri Samvirke i Vrådal. Målaren er den 32 år gamle Jon Are Myhrer frå Minnesund.

– Utstillinga viser eit breitt spekter av måleri av dyr, natur og landskap frå Romerike, Innlandet og Telemark, presenterer Myhrer.

Sidan 2011 har han vore elev hjå den figurative målaren Jan Petter Bratsberg (fødd i 1948) frå Skien. Myhrer har også ein mastergrad i visuelle kunstfag og design frå høgskulen på Notodden. Han har delteke på fleire utstillingar, og i 2022 hadde han separatutstilling saman med Bratsberg i Galleri Nyhuus på Gvarv. Han har elles hatt separatutstillingar på Bok- og blueshuset på Notodden og i Galleri Festiviteten på Eidsvoll Verk.

Biletkunstnaren Jon Are Myhrer arbeider i ei naturalistisk retning. I tillegg til å utøve målarkunsten jobbar han også som fotograf.

– Eg brukar mykje tid på å fotografere dyr og fuglar, og nyttar fotografia som utgangspunkt for måleria, fortel han.

Utstillinga i Galleri Samvirke blir ståande ut mars månad.