Alt er bare Abba
Kulturskuleelevane i Seljord varmar denne veka opp publikum med konsertar i forbifarten før det blir både teater og musikk frå Abba på framsyninga torsdag kveld.
Torsdag kveld inviterer teatergruppa, ulike song- og musikkelevar og lærarane ved Seljord kulturskule til Abba-framsyning i kinosalen på Granvin kulturhus i Seljord.
– Heile veka har det vore og blir det Abba-tema på ulike musikalske innslag på Granvin, mellom anna med konsertar i forbifarten både på ettermiddag og kveldstid, seier kulturskulelærar Gunn Steinstad og kulturskulerektor Anne Torunn Øverbø.
Artikkelen held fram under annonsen.
Teatergruppa til kulturskulen, som starta opp i fjor haust, har sett Mamma Mia-filmen, og skrive om og laga ulike scenar frå filmen som vil ramme inn konserten.
– Dette skaper ei handling der det også blir musikalske innslag frå lærar- og elevband, alt sjølvsagt henta frå Abba sitt repertoar, seier Øverbø.
Fredag inviterer kulturskulen elevane frå Seljord og Flatdal skule til den same Abba-framsyning på dagtid.
Kulturskulen brukar Granvin til alle sine aktivitetar dei har i Seljord.
– Me er veldig glade for at me har så godt eit samarbeid og høve til å finne på mykje forskjellig, seier kulturskulerektoren.
