Forsikringsselskap fryktar fleire bilskadar i vinterferien
Årets vinterferie må bli innanfor Noregs grenser. Derfor fryktar forsikringsselskap endå fleire skadar med fleire bilar på glatte vintervegar.
Denne helga blir vinterferien sparka i gang i store delar av landet.
Pandemien dominerer framleis reisemoglegheitene, og derfor bruker kanskje ekstra mange nordmenn i år vinterferien sin til å reise på hytte eller til familie som bur ein annan stad i landet.
Artikkelen held fram under annonsen.
I fjor registrerte forsikringsbransjen bilskadar for nær ein halv milliard kroner i vinterferievekene. Kommunikasjonsrådgivar Torbjørn Brandeggen i Tryg Forsikring fryktar endå fleire skadar i år sidan ingen reiser til utlandet.
– I fjor var det 1.474 trafikkulykker fredag før vinterferien. Og dei fleste ulykkene skjedde på ettermiddagstid, frå klokka 12 og utover, når folk stod i kø for å komme seg ut av byane, seier han.
Han ber folk vurdere å heller reise til hytta laurdag eller søndag i staden.
– Det pleier vere mykje mindre trafikk då enn fredag ettermiddag og kveld, og ulykkestala er langt lågare i helgane, seier Brandeggen.
(©NPK)