Innbyggjartalet i Kviteseid har vore mest stabilt i Vest-Telemark det siste året, men trenden over tid er dramatisk.
Innbyggjartalet i Kviteseid har vore mest stabilt i Vest-Telemark det siste året, men trenden over tid er dramatisk.

Det har aldri vore færre innbyggjarar i regionen enn det er nå

For fyrste gong er innbyggjartalet i Vest-Telemark under 14 000. Dei 181 som har blitt borte det siste året er enkelt rekna verdt totalt 9 millionar kroner i kommunekassene.

Statistisk sentralbyrå presenterte innbyggjartalet for tredje kvartal onsdag. Det er dyster lesing for alle dei seks kommunane i Vest-Telemark. Ingen har hatt vekst i folketalet, og den totale nedgangen samanlikna med for eitt år sidan er på 181 personar. Ved utgangen av tredje kvartal i fjor var det 14 077 vesttelar. No er det 13 896.  

Mest dramatisk er tala i Nissedal. 32 færre nissedølar gjev ein nedgang på 2,2 prosent, klart mest i Telemark. Med unntak av Kviteseid så har alle dei fem kommunane ein nedgang på meir enn 1 prosent. I Kviteseid har det blitt seks færre personar, noko som utgjer 0,2 prosent. 

Artikkelen held fram under annonsen.

– Det må vera «all time low». Dette er veldig dårlege tal som går rett inn i kommuneøkonomien, seier Audun Thorstensen hos Telemarksforsking. 

Han seier ein snittinnbyggjar er «verd» om lag 50 000 kroner. Med 181 færre vesttelar kan det bety ni millionar kroner mindre å rutte med for dei seks kommunane. 

– Det er vanskeleg å fastslå utslaget i og med at det finst kompensasjonsordningar. Men langtidseffekten er uansett negativ, seier Thorstensen. 

– Kvifor har det blitt slik?

– Det er samansett, og heng saman med attratikivtet og tilgang på arbeidsplassar, mellom anna, seier han. 

Han har registrert at veksten også på landsbasis har gått ned, i tillegg til sentraliseringstrenar. Det slår brutalt ut i ein region som Vest-Telemark. 

– Tredje kvartal er det kvartalet det skjer mest i med mykje flytting og mange fødslar, seier han. 

Ei rask oversikt over folketalsutviklinga i Vest-Telemark viser at det i 1980 var 15 746 innbyggjarar i regionen. Ti år seinare var talet 15 706. Ved tusenårsskiftet var det 14 770 vesttelar, medan det i 2010 var 14 251. 

Artikkelen held fram under annonsen.

                 3k 2018       3k 2019    utvikling    utvikling i %

Seljord           2922           2891            -31              -1,1

Kviteseid       2408           2402              -6              -0,2

Nissedal        1478           1446             -32             -2,2

Fyresdal        1304           1284             -20             -1,5

Tokke            2228            2194            -34             -1,5

Vinje              3737           3679            -58             -1,6