Vest-Telemark Blad

Les VTB elektronisk!

No er me på alle plattformer.

Papir - Lesebrett Mobil - PC/Mac

Spansk Michelin-kokk hamna på bygda

Gabriela Stockler har jobba på fleire Michelin-restaurantar i si karriere, men no har kjærleiken lokka ho til Rauland, der ho no er kokk på høgfjellshotellet.

Gabriela Stockler (26) frå Spania har jobba på nokre av verdas beste restaurantar, både i Madrid og i London. Så korleis enda ho opp på Rauland høgfjellshotell?

Randi Berdal Hagen
randi@vtb.no

Kjærleikens vegar er uransakelege. Han har til og med evna til å feie med seg ein spansk stjernekokk frå Madrid, få henne til å gje opp jobben i ein restaurant med 2 stjerner i Michelin-guiden – for å flytte til kjærasten på Rauland.
– Absolutt alt her er heilt motsatt av livet mitt i Madrid, meiner ho.
– Der jobba eg heile tida. Eg tenkte berre på jobben, eg stressa mykje og eg budde og jobba midt i sentrum av Madrid. Så var eg plutseleg her, midt i denne nydelege naturen, der tempoet er så mykje lågare. Eg blir nesten litt stressa av at det er så roleg, smiler den nye kokken på høgfjellshotellet.

Lang merittliste
Stocklers CV er imponerande. Ho har jobba lenge i Madrid, mellom anna under kokken Sergi Arola, som er kjent for å ha kome frå kjøkkenet til det som er kjent som verdas beste restaurant, El Bulli. Ved Sergi Arola Gastro var ho heilt til å flytta til Rauland denne månaden.
Fram til i fjor arbeidde Gabriela ved to ulike restaurantar i London. Fat Duck blei kåra til verdas nest beste restaurant i 2008 og har heile tre Michelin-stjerner. Den andre, Maze, er det kjendiskokk Gordon Ramsey som står bak. Maze har ei stjerne i Michelin-guiden.
Men til Rauland ville ho likevel, sjølv om det nesten kan sjå ut som ho samlar på Michelin-stjerner.

Glad for erfaringa
– Då eg var på ferie her med kjærasten min i fjor sommar, blei eg heilt forelska i Rauland. Å klatre rundt i fjellet, plukke bær og sopp for å tilberede det etterpå – det var heilt fantastisk. Frå restaurantkjøkkenet har me utsikt over den vakre raulandsnaturen. Dette er noko heilt nytt for meg, fortel Gabriela.
Ho er likevel svært glad for at ho har fått sjansen til å ha den karrieren ho har hatt.
– Å jobbe på slike stjernerestaurantar gjev deg enormt med disiplin. Ikkje berre på kjøkenet, men òg i livet elles. Dessutan får ein bruke dei aller beste råvarene og jobbe med dei beste på området. Så eg er takksam for at eg har fått arbeide på det nivået i så mange år, seier 26-åringen, som har senka skuldrene litt etter at ho kom til Rauland.

– Noko heilt nytt
I samband med at Gabriela Stockler byrja som kokk ved Rauland høgfjellshotell, har dei no lansert eit heilt nytt konsept på restaurantfronten.
Tilbodet ved Restaurant Falkeriset er utvida med ein eigen à la carte-avdeling, som Stockler har ansvaret for. Konseptet skal i denne omgang vare til over påske, så om ein vil teste ut tilbodet om lokale råvarer med ein Michelin-tvist, må ein vere snar.
– Me er overlykkelege for å ha fått ein kokk som Gabriela hit. Det er rein skjær flaks for oss at kjærleiken lokka henne hit til Rauland, for me hadde nok ikkje klart det sjølv om me hadde prøva, seier hotelldirektør Kristian Samnøen.

Unikt i distriktet
Han er storfornøgd med det nye konseptet dei no tilbyr, og stolt av at dei kan ta i bruk lokale råvarer i det eksklusive tilbodet.
– Dette konseptet er unikt her i distriktet. Rauland har forandra seg mykje dei siste åra. Hyttemarknaden har eksplodert, og der finst det eit stort kundegrunnlag som ynskjer ulike ting. Hotellet er omringa av hytter på alle kantar, så kven veit – kanskje er det avdelinga til Johan som er hovudområdet vårt om nokre år, og ikkje sjølve hotelldrifta, seier Samnøen og nikkar mot kjøkkensjef Johan Sjöberg.
Stockler, Sjöberg og Samnøen håpar folk vil setje pris på nysatsinga, som er noko utanom det vanlege her oppe i vestfylket.
– Eg kjem ikkje til å lage norsk tradisjonsmat, for det kan eg ikkje. Det er heller ikkje konseptet vårt i denne à la carte-restauranten. Men eg kjem til å bruke mykje lokale råvarer, for her er mange gode produkt, seier den spanske stjernekokken, som alt har omfamna både Holte-kylling og Vesaaskurv.

Artikkelen er publisert 25/02-2010