annonse

Snart kan det bli slutt på å stille klokka

Viskar ut skiljet:
Viskar ut skiljet: Om eit par-tre år er det antakeleg slutt på å stille klokka mellom sommar- og normaltid. (Foto: Line Omland Eilevstjønn)

EU-kommisjonen meiner vekslinga må kuttast ut.

Line Omland Eilevstjønn

I dag bekrefta EU-kommisjonens president Jean-Claude Juncker at han ønskjer at alle i EU skal slutte å veksle mellom sommar- og normaltid.

Dette seier han med bakgrunn i ei stor undersøking der meir enn 80 prosent svarar at dei ikkje vil ha ordninga meir, skriv NRK. 

4.6 millionar europearar har svart på undersøkinga. EU vil stette ønsket deira. 

Vurderast i Noreg

Her i Noreg er det næringsdepartementet som har ansvaret for saka. Torbjørn Røe Isaksen (H) seier til NRK at det blir spennande å sjå kva EU-kommisjonen til slutt landar på når forslaget skal behandlast, og at næringsdepartementet skal gjennomgå saka sjølve snart.

– No må me òg vurdere det, då dette vil påvirke oss uansett. Noreg er avhengig av handel med andre EU-land, og det er generelt ein fordel for næringslivet at me har same tid som nabolanda våre, seier Isaksen, som forstår kvifor saka engasjerer.

– Det engasjerer både småbarnsforeldre, som meg sjølv, og folk som er spesielt opptekne av søvn. I tillegg har ein større ting, som produktiviteten i samfunnet. Det er mange meiningar om tradisjonen med å stille klokka.

I nokre europeiske land har dei stilt klokka fram og tilbake heilt sidan fyrste verdskrigen. Formålet var å spare energi.

Landa bestemmer sjølve

Viss endringa av ordninga går gjennom, vil lova frå 1996 der Noreg og alle EU-landa blei einige om at sommartida startar siste søndag i mars og sluttar siste søndag i oktober forsvinne heilt. 

EU-kommisjonen opnar for at EU-landa sjølve kan bestemme om dei ønskjer sommartid heile året.

Forslaget seier at EU-landa skal slutte å stille klokka alt i 2019.

Klikk for å sjå kommentarar ()

Her kan du fritt komme med synspunkt og informasjon. Me krev fullt namn. Då blir det meir interessant for andre å lese det du skriv. Trakassering, truslar, hatske meldingar eller reklame aksepterasr ikkje på vtb. Falske profilar blir utestengt. Ver sakleg og vis respekt når du kommenterar.