Heidra Ullmann med fest

– Folkehøgskule-pioner, Venstre-pioner, forfattar, folketalar og kvinnesaksforkjempar. Han sette spor etter seg, Viggo Ullmann, uttala festtalar Jan Kløvstad laurdag.

Med talar, foredrag, middag og jubileumsfest markerte Seljord kommune, folkehøgskulen og sogelaget i bygda at det var 170 år sidan folkehøgskule-grunnleggaren Viggo Ullmann vart fødd. Lars Bjaadal, tidlegare rektor ved folkehøgskulen, leia jubileumskomiteen og losa både barneskuleelevar, folkehøgskuleungdom og jubileumsgjester gjennom eit rikhaldig program.

– Eg vil takke for det kommunale initiativet til denne markeringa. Nå kjenner fleire til kven Ullmann var og kvifor me har ei byste av han i bygda vår, uttala Bjaadal.

Les også:Kvifor står denne mannen på sokkel utanfor skulen i Seljord sentrum?

– Kommunen er stolte av det arbeidet som Ullmann gjorde, og ser den dag i dag resultat av arbeidet han la ned på slutten av 1800-talet med Seljord folkehøgskule som lever i beste velgåande, sa ordføraren.

Jan Kløvstad har tidlegare skrive bok om Ullmann, og hadde festtale på Granvin laurdag kveld.

– Han sette spor etter seg, Viggo Ullmann. Det er altså ingen grunn til å ønske fred over hans minne, men la han heller inspirere oss til «Ild, begeistring og varme», uttala Kløvstad.

Odd Einar Dørum (V) teikna litt av rommet kring Ullmann i si tale, og minna dei frammøtte om at me menneske kan vere med å forme framtida.

– Av Ullmann kan ein lære at ein skal vere truverdig og samvitsfull, uttala Dørum

Festkvelden vart avslutta med ei rungande framføring av «Vad solskin er for det sorte muld».