Hiphopdans for gode haldningar

Dansegruppa Radix kom til Vinje for å lære dei unge å danse hiphop. – Dansen gir god sjølvkjensle seier, Tine Fossmo.

Det var Dansekunst i Grenland som arrangerte workshop innan hiphopdans på Vinjehuset sist sundag. Instruktørane var det oslobaserte dansekompaniet Radix, som lærte bort ulike dansestilar innan hiphop.

Karine Leonardsen som er ei av medlemmene i dansekompaniet, skrytte av innsatsen til dei lokale deltakarane.

– Dei har fått ei rask opplæring, og dei virka genuint interesserte i å lære å danse hiphop. Eg trur det var mange som ikkje hadde vore borte i dette før, sa Leonardsen.

Workshopen gjekk ut på at deltakarane skulle få ei innføring i hiphopdans, og då særleg frå den originale kulturen som vart skapt i New York på 70-talet. Det er ein type gatedans som har mange uttrykk, enten det er fristyle, eller andre meir koreograferte dansar.

– Dei lærer ein del grunnteknikkar av den originale «old school» hiphopdansen, som er eit viktig kulturutrykk å ta vare på. Den passar like godt for gutar som til jenter, held ho fram.

Foramsyning

På kvelden opptredde Radix sjølv med ei danseframsyning som tok for seg mange tema som opptek ungdomar i dag, fortel dagleg leiar i Dansekunst i Grenland, Tine Fossmo.

– Det er problemstillingar som til dømes sjølvkjensle og om å sette andre menneske i bås. Dette er jo likt over alt, og er like aktuelt i Vinje som alle andre plassar i landet, seier Fossmo.