Vest-Telemark Blad

Les VTB elektronisk!

No er me på alle plattformer.

Papir - Lesebrett Mobil - PC/Mac

Generasjonsskifte i verkstaden

Rollebyte: I jubileumsåret blir det sjefsbyte i verkstaden på Flatin. Trond Brekke tar over som dagleg leiar, men far Nils Tore forsikrar at han blir i jobben som mekanikar på Flatin i mange år til.

Denne hausten kan mekanikarane på Flatin i Kviteseid markere 15-årsjubileum og sjefsskifte i verkstaden.

Etter eit par år med skiftenykel og olje på hendene hos Veierud bil i Kviteseid starta Nils Tore Brekke som mekanikar på Kviteseid autosenter, bilverkstaden til Siggen (Karl Sigfred) Bakken.
– Det var i 1980, men i 1986 starta eg mitt eige firma, Sentrum bil. Eg heldt framleis hus saman med Siggen der han hadde bensinstasjon, fortel Nils Tore som også hadde køyrd kranbil sidan 1979, ei teneste han haldt fram med til 2006.

Ny epoke
– I 1990 kjøpte Tore Andersen alt me hadde på Sentrum bil og ein ny verkstad blei etablert på Flatin. Andersen etablerte Kviteseid motorservice, og bilverkstaden blei plassert vegg i vegg, der me framleis er i dag, seier Nils Tore.
I 1997 starta Nils Tore verksemda Kviteseid bilverkstad, og kan denne hausten feire 15-årsjubileum.
– Våren -97 var eg ferdig med vidaregåande skule, og etter eit par månader med verkstadjobb i Drangedal starta eg som mekanikar her hos pappa, fortel Trond Brekke.
– Atle Andersen var også tilsett som mekanikar her fram til 2006 då han overtok verksemda til far Tore på andre sida av bygget. Kristian Skogheim fullførte også læretida og tok fagbrevet på verkstaden. Svoger Svenn Terje Bonde starta hos oss i 2006 og mamma Elisabeth har vore deltidstilsett på kontoret sidan 1986, fortel Trond.
– Ja, me er vel ei slags familiebedrift, ler han.

Tar over
For eitt år sidan starta Trond å ta over styringa på verkstaden, men på papiret får han ikkje sjefstittelen før i haust.
– Trond har vore teknisk leiar sidan mars 2005, det vil seie det er han som har ansvaret for EU-kontrollar på bil, fortel Nils Tore.
Verkstaden er medlem i Sjekkpunkt-kjeda, noko som gjer det litt lettare å fylgje opp kvardagens reglar og krav ein verkstad må fylgje.
– Kjeda passar på at me får den informasjonen me treng, og har også mange tilbod om ulike kurs. Kjeda gjennomfører 100.000 EU-kontrollar årleg i Noreg. Her i Kviteseid har me om lag 600 kontrollar på personbil i året, fortel Nils Tore.

Mange faste
Det er stadig folk innom verkstaden med tekniske spørsmål, behov for reperasjon eller service på bilen.
– Me har mange faste kundar, ja, dei aller fleste kundane er det. Men me har også mange som kjem innom når dei er i området og treng hjelp med bilen. Dei siste to åra har det jamt vore mykje å gjere og det er veldig bra, smiler far og son Brekke.
Ein vanleg dag på verkstaden kan by på oppgåver som å fikse feil på bremsesystem, oljeskift, EU-kontrollar, finne feil ved risting og ulydar under køyring, kontroll av girkasser, skifte av registerreim eller arbeid med motorhavari.
– Dei har me nokre av nå, seier Nils Tore og ser ut glaset medan han tel.
– Seks stykk står på vent, det er store jobbar som kan ta ein dag, eller ei heil veke for ein av oss, seier han.
– Ja, me har nok å gjere i fjorten dagar fram i tid i alle fall, supplerar Trond.
– Er det nokre reperasjonar ein ser meir av enn anna?
– Ja, bremsar og problem med forstilling. Det skuldast heilt klart den dårlege vegstandarden me har her, og bremser og rust på bilane er eit hyppigare problem grunna saltet dei skal ha på vegane, seier Nils Tore.

Før og nå
Tidene endrar seg i alle yrke, noko ein også ser i verkstadane. Før var det ikkje anna å gjere enn å finne fram verktyet, skru frå kvarandre delane og finne ut kva som var feilen.
– Ta til dømes test av pluggar, stiftar eller justere tenninga på ein bil. Der måtte me skru frå kvarandre før, nå finn me fram datamaskina, koplar ho til bilen med ein feilsøkar og prøvar å finne feilen. Nokre gonger finn ho feilen raskt, medan andre gonger må ein tilbake til gamlemåten og søkje manuelt.
– Det er eit verkty og hjelpemiddel, men det er slett ikkje slik at me kan kople datamaskina til bilen – og vips er bilen fiksa. Det hadde vore lett om ein fekk opp valet om; slett feilkode og fiks bil, nei, det hadde blitt som å trylle, ler Trond.
– Bilen i dag er som ei stor datamaskin, mange små styresentralar er sett saman. Difor treng ein også det tekniske utstyret det er behov for, og sidan me tar reperasjonar på alle bilmerke må me ha ulike diagnosesøkjarar på plass, seier Nils Tore.

Blitt meir komplisert
– Men før stod folk meir fritt til å fikse på bilen sjølv. Nå kan ein knapt gjere det utan at ein må på ein verkstad, meiner mekanikarane.
Ta til dømes skifte av ljospærere på bilen. Før var det ei enkel oppgåve, gjekk pæra kunne ein svinge innom næraste bensinstasjon, opne panseret og bytte pæra. Slik er det ikkje i dag.
– Skal ein tildømes bytte frontlyset på ein Passat må ein demontere heile fronten, ta av støytfangar og ta ut hovudlampa for å kome til, fortel Svenn Terje.
– Slik burde det ikkje vore. Nye bilar burde også vere laga slik at folk sjølv kunne bytte pæra om ho slutta å fungere. Med tanke på trafikktryggleiken er det ikkje bra at ein til dømes må vente på ledig time på ein verkstad før ljosa på bilen blir i orden att, meiner Nils Tore.

Vil feire
Sjølv om Trond overtek roret i verksemda, legg han ikkje opp til store endringar i drifta.
– Målet vårt er vel å bli flinkare til alt, smiler den nye sjefen medan dei to andre nikkar samde.
Korleis vil de feire 15-årsjubileet?
– Me vil ha ei markering nå på seinsommaren med litt show og moro som folk kan vere med på. Men kva det blir vil me ikkje avsløre heilt enno, smiler Trond, ny dagleg leiar ved Kviteseid bilverkstad.

Artikkelen er publisert 09/08-2012