Vest-Telemark Blad

Les VTB elektronisk!

No er me på alle plattformer.

Papir - Lesebrett Mobil - PC/Mac

Mot løysing på Hallbjønnsekken

Satsar: Ole Kristian Lillegård driv gatekjøkkenet på Dalen. No satsar han på å setje i gang drift på Hallbjønnsekken rundt joletider etter at firmaet hans, Tokke eigedom AS, ser ut til å ha fått tilslaget på hovudbygningen på Skafsåheii.

Etter at drifta ved Hallbjønnsekken har lege nede i over eitt år, ser det no ut til å gå mot ei løysing for å få i gang både kafeteria, pub og skitrekk på Skafsåheii.

Tokke eigedom AS ved Ole Kristian Lillegård har i fleire år drive gatekjøkkenet på Dalen. I fjor kjøpte firmaet bygget som i tillegg til gatekjøkkenet også har fleire utleigehyblar. No satsar Lillegård vidare etter å ha fått tilslaget på hovudbygningen på Hallbjønnsekken. Bygget inneheld kjøkken, restaurant, pub, bar, peisstove, møterom, lager, kontor, toalett, dusj, badstove, teknisk rom og to leilegheiter. Det betyr at seljaren ser ut til å dele opp heile salsobjektet.

Styret vurderer
– Det er ein av modellane som styret vurderer. Me har kome langt i samtalene med Tokke eigedom AS, og det går mot ei løysing. Dette er godt nytt for alle partar, ikkje minst for hytteeigarar i området. Me har også kontakt med interessentar med tanke på skitrekket og varmestova, seier Harald Gilje i Harald Gilje Consulting, som står for salet av Hallbjønnsekken familieresort.
Lillegård er klar for å setje i gang på Skafsåheii, og han har trua på at partane blir samde.
– Det er framleis nokre detaljar som må på plass før kontrakten blir underteikna, men det ser svært lovande ut. Me har vore i forhandlingar i eit par månader no, og så langt er båe partar interessert i å få i stand ei avtale. For meg er det viktig at skitrekket også kjem i gang. Eg trur me er avhengige av kvarandre, og ikkje minst vil det vere viktig for hytteeigarane i området at det blir aktivitet båe stader, seier Lillegård.

Håpar å opne i romjoli
Gatekjøkkenet på Dalen held stengt vinterstid, og utan at Lillegård kan seie noko eksakt om opningstider på Hallbjønnsekken, tek han sikte på å opne 1. joledag i år.
– Sommaren etter at vegen over Suleskard opnar og fram til han stenger om hausten er ein viktig periode. Det same vil vinteren vere, og helgene er også interessante. No får me fyrst få avtala i hamn før me blir meir konkrete, men målet er å opne dørene 25. desember, smiler Lillegård.
Han ynskjer å satse på husmannskost på menyen. Det skal bli mat for både store og små til rimelege prisar.
– Det er viktig å tenkje kvalitetsmat som dei fleste likar, og prisane må heller ikkje vere for stive. Eg tek med meg alle gode erfaringar frå gatekjøkkenet, og eg satsar på at fornøgde kundar også fylgjer med, seier han.

Hardt arbeid
Innsatsen er nokså høg, men den driftige karen er optimist med tanke på at det er liv laga å drive på Skafsåheii.
– Eg er ikkje i tvil om at det blir nokre tøffe år i starten. Det blir på ein måte å starte i motbakke, men eg er innstilt på å forsere bakken og kome meg til topps. For å seie det rett ut så satsar eg mykje no. Det blir alt eller ingen ting, og det er no ein gong slik at ein får ikkje til noko om ein ikkje satsar, fortel Lillegård.
Mange har etterlyst lokale drivarar på Hallbjønnsekken. Både lokalkunnskapen og magemålet er viktige faktorar for å lykkast.
– Får ikkje Ole Kristian det til, veit eg ikkje om det er liv laga i det heile, var det ein som sa då han fekk greie på at Lillegård skal drive restauranten på fjellet som skil skafsåingar og setesdølar.

Viktig for hytteeigarar også
– I slutten av august reknar eg med at kontrakten er underteikna og at eg kan setje i gang med meir konkret arbeid, avsluttar Lillegård.
Etter det VTB har grunn til å tru, er også skitrekket i ferd med å få nye eigarar og drivarar. Truleg er det folk med eigarinteresser i området som er mest aktuelle. Dermed kan det gå mot ein sesong med drift i heile anlegget på Skafsåheii, noko som betyr mykje for både hyttefolk og tilreisande. Ikkje minst vil det gjere det meir attraktivt å ha hytte i området.

Artikkelen er publisert 07/08-2012