Vest-Telemark Blad

Les VTB elektronisk!

No er me på alle plattformer.

Papir - Lesebrett Mobil - PC/Mac

Akkurat rette tida å overta

To har blitt til seks: Ragnhild og Sverre Haugstøyl valde alt no å la neste generasjon overta garden. Det gjer at Camilla, Leif og barna Ingrid Elise og Daniel også har blitt innbyggjarar på Fjone.

At Ragnhild og Sverre Haugstøyl på Fjone alt no overlet garden til neste ledd, var akkurat rette tida for sonen Leif. Elles hadde nok familien på fire etablert seg i Stavanger.

Søgard på Fjone i Nissedal kommune er på totalt 8.900 dekar. Ragnhild (59) og Sverre Haugstøyl (64) overtok garden i 1974, og fire år seinare flytta dei inn i nytt hus etter å ha måtta rive det gamle.
– Me kom til ingen ting. Det var hestereiskap verdt 200 kroner og skogen då me overtok, seier Sverre.
Ekteparet bruka inntekter frå skogen til vedlikehald og å byggje opp garden. I 1986 starta arbeidet med å etablere både Sandnesodden camping og ny butikk i bygda.
– Det var travelt ei beite, og moro. Elles hadde me ikkje gjort det, seier dei.
Ei viktig årsak for å opparbeide gjesteplass på Sandnesodden der det i årevis har vore 65 faste campingvogner, var å ha ei grei attåtnæring til garden.
– Du skal levere ein gard i betre stand enn då du overtok han. Det skal vere leveleg for dei som kjem etter, elles kan dei ikkje ta over, seier Sverre.

Hadde blitt aleine
Sonen Leif er 37 år, og foreldra meiner han no absolutt må få kome til og overta garden. Leif er gift med Camilla Sunde frå Stavanger, og dei har barna Daniel og Ingrid Elise.
– Tida går frå ein, og du mistar noko av initiativet når du passerer 40. Eg tek ut tidlegpensjon, for no er det rette tida for Leif å overta, seier Sverre, som vil halde fram med å drive ein del med anlegg og gravemaskin.
Både han og kona meiner det ikkje er rett å sitte så lenge på garden at ein må hoppe over ein generasjon.
– Me kunne ha sitte med garden mykje lenger, men då hadde me blitt her aleine og dei hadde blitt verande i Stavanger, seier Ragnhild og Sverre.
– Me hadde ikkje flytta hit om me ikkje hadde fått sjansen til å overta garden. Eg er glad for at det skjer no. Me budde i leigd hus i Stavanger, og det var tida for at me skulle etablere oss med fast bustad. Hadde me kjøpt hus ved heimtraktene til Camilla og om ti år fått tilbod om å overta garden på Fjone, hadde me nok blitt buande i Stavanger, seier Leif.

Rett utdanning
Han har ikkje vore bastant på å flytte heim att, det var eit viktig vilkår at Camilla blei med.
– Eg trefte Leif for ti år sidan, og har heile tida visst at han er odelsgut. Eg skuva på for at me måtte prøve å bu på Fjone, seier Camilla.
Når ein ikkje veit heilt kva ein går til, kan det vere greitt å prøvebu, og det har Camilla og Leif gjort på Søgard i to år. Ragnhild og Sverre bur i ny kårbustad på ein ås 200 meter unna, ei tomt med nydeleg utsikt.
– Det fungerer bra å bu her, og det er veldig greitt å ha besteforeldra til ungane så nære, seier Leif.
– Me hadde ikkje klart oss utan Ragnhild og Sverre. Me har kome til ein triveleg plass, og alt ligg til rette for å bu her. Eg er godt fornøgd med hus og gard og det sosiale som er i nærleiken. Det er litt tilvenning for meg enno, men me legg til rette for mykje besøk frå venner og familien min, og det har mykje å seie, kjem det med eit smil frå Camilla.
Ho hadde tidlegare tatt ei utdanning som lite truleg ville gjeve jobb når ho flytta til Fjone. Derfor valde ho i tillegg å utdanne seg som sjukepleiar, og det gjer det lettare å få jobb på bygda.

Litt vemodig
Leif er snikkar, har byrja å drive Sandnesodden camping og skal overta heile garden til nyttår. Det er ikkje plan om å ha husdyr, men skogen skal drivast og takast vare på, slik som garden.
– Eg har vakse opp med tanken om å overta garden, så dette er ikkje noko nytt for meg. Eg er veldig innstilt og litt spent på å overta, seier Leif.
Sverre vedkjenner at det å overlevere garden alt no er både òg.
– Det er litt vemodig, men ein må ta til fornufta, seier han.
– Eg har ikkje lengta ned til Søgard i det heile, skyt Ragnhild inn.
Sverre seier det er viktig at Leif får styre garden, og at faren ikkje går inn og dirigerer.
– Men sjølvsagt får Leif den hjelpa han treng. Me har eit godt forhold, seier Sverre.
– Me har tatt det rette standpunktet, og kosar oss med det. Og det er veldig triveleg med barnebarn i nærleiken, slår Ragnhild og Sverre fast, klare til å la femte ledd i slekta sleppe til før det er for seint.

Artikkelen er publisert 21/07-2012