Vest-Telemark Blad

Les VTB elektronisk!

No er me på alle plattformer.

Papir - Lesebrett Mobil - PC/Mac

Framleis til sals

Til sals: Hallbjønnsekken familieresort er til sals for 9,8 millionar kroner.

Hallbjønnsekken familieresort blei lagt ut for sal tidleg i vår. Så langt er det ingen som har bladd opp 9,8 millionar for anlegget.

Anlegget på Skafsåheia i Tokke består mellom anna av resepsjonsbygget med restaurant/kafeteria, pub, resepsjon, tekniske rom og to leilegheiter. I tillegg kjem diverse garasjar, to skitrekk, varmestove, vekeandelar i «time-share» hytter og leilegheiter, service- og driftsavtaler.
Det er selskapet Destinasjon Hallbjønn AS som eig dei to selskapa AS Turist-Senter og Hallbjønn Aktivitets- og Vedlikeholdstjenester AS. Dei to sistnemnde selskapa eig bygningar, anlegg, eigedom, og står for drifta i tilknyting til Hallbjønnsekken familieresort.
Seljarane antyder ein pris på 9,8 millionar kroner for anlegget. I tillegg kjem omkostingar.

Stille
Det er firmaet Harald Gilje Consulting som står for seljarens handtering av salet. Så langt har det vore nokså stille rundt senteret.
– Anlegget ligg framleis ute i marknaden, og me håpar sjølvsagt at nokon ser potensialet. Eg kan ikkje seie at det er noko konkret i høve til namngjevne interessentar i dag, men det er fortløpande vurderingar av kva som skal skje vidare. Det er mogleg det blir meir aktivitet når me nærmar oss sommarsesongen, men inntil vidare ligg prospektet ute som det er, seier Harald Gilje.
– Det er veldig kjedeleg at det ikkje har skjedd noko på Hallbjønnsekken. Å gjennomføre eit slikt sal vil ta tid, og eg fryktar at den komande vintersesongen også kan stå i fare om det ikkje skjer noko snart. Det er ikkje bra for omdømet om både trekk og servicebygg blir stengt komande vinter også, seier Nils Gjerde, næringssjef i Tokke.
– Eg trur det er veldig få, om nokon i det heile, som veit kva som skjer med senteret. Det er i alle fall ikkje enkelt å få opplysingar, legg han til.
Det lykkast ikkje å få tak i Tom Chr. Egeland, styreleiar i Hallbjønn Aktivitets- og Vedlikeholdstjenester AS.

Artikkelen er publisert 12/06-2012