Vest-Telemark Blad

Les VTB elektronisk!

No er me på alle plattformer.

Papir - Lesebrett Mobil - PC/Mac

Gamal plan kan stogge Straumsnes-planar

Gamal plan kan stoppe ny: Onsdag skal politikarane i Kviteseid ta stilling til om dei vil stø opp om Petter Johnsen og Vrådal Panoramas nye planar for eigedomen Straumsnes.

Formannskapet skal handsame planframlegget for Straumsnes i Vrådal i møtet onsdag. Rådmannen frårår utbyggjaren å arbeide vidare med planen som bryt med tidlegare vedteken reguleringsplan.

Som VTB presenterte i førre veke, ynskjer Vrådal Panorama med dagleg leiar Petter Johnsen å byggje opp bustadar og fritidsbustadar på eigedomen Straumsnes, som han kjøpte i fjor haust.
– På Straumsnes ynskjer me å byggje opp eit komplett område med 37 bueiningar, der fastbuande og fritidsbustader er knytt saman til eit anlegg som er fullt ut bygd for at funksjonshemma også kan kome til over alt, uttala Johnsen.

Bustad og næring
Kviteseid kommune har hatt planar knytt til området tidlegare, mellom anna ved kommuneplanrulleringa i 2005/06. Då blei området, av dåverande eigar, spela inn som eit aktuelt område for fritidsbustadar. Kommunestyret vedtok at «i område så nært Straumsnes skule er det ikkje ønskjeleg med ytterlegare utbygging av fritidsbustadar. Det gjeld også resten av området etter avgrensing av buffersoner».
Førre eigar fekk utarbeidd ein reguleringsplan der ein la opp til heilårsbustadar kombinert med næring. Denne planen blei godkjent av kommunestyret i 2009/10. I dette vedtaket gjekk politikarane inn for «… ei utvikling som kunne innebere utbygging av heilårsbustadar, gjerne i kombinasjon med noko næringsverksemd».

Held på gamal plan
Etter at Vrådal Panorama varsla igangsetjing av planarbeidet på Straumsnes i slutten av april i år, har det kome nokre negative reaksjonar på planvarslet. I desse breva blir tiltakshavar mellom anna oppmoda av ein privatperson til «avbryte forsøket på å oppnå vesentlege endringar i reguleringsplanen, og i staden tilpasse planane sine for området til reguleringsplanen som blei godkjent så seint som i 2009».
Vrådal Vel har også kome med innspel til planane og bed om tillit til at tidlegare politiske vedtak står ved lag og blir respektert. Dei meiner dei to kommunale planane må bli lagt til grunn for vidare planar for området, og ynskjer heller ikkje nå fritidsbustadar på området, og vil bevare friluftsområda Friland 1 og 2.

Regulert før
Rådmannen meiner han ikkje kan tilrå ei planendring utan å kome i lojalitetskonflikt med tidlegare politiske vedtak for området. Han skriv i saksutgreiinga at det difor er mest naturleg å tilrå å oppretthalde status quo, både ut frå forhistoria og det engasjementet saka då utløyste.
I innstillinga til formannskapet seier rådmannen at ut frå at det nyleg er vedteke ein reguleringsplan for området, der det blir slått fast at arealet i hovudsak skal nyttast til kombinasjonsføremålet heilårsbustad/næring, blir forslagsstillar frårådd å arbeide vidare med ein plan som bryt med denne føresetnaden, noko planvarselet synest å signalisere.
Men rådmannen legg også til at det politisk vil vere legitimt å endre syn i saka, særleg ut frå nye moment forslagsstillar har kome med tanke på ei utbygging fullt ut tilrettelagt for rørslehemma.
– Det må utan tvil seiast å vere både spenstig og banebrytande prosjekt her i landet. Isolert vil området liggje til rette for ei slik utvikling. At planen legg opp til gang- og sykkelveg frå skulen gjennom planområdet og mot Vrådal sentrum må sjåast på som ein fordel. Ei endring kan og forsvarast ut frå at det ikkje er nokon som har etablert seg i dette området etter 2009, og som slik skulle ha ei særskilt rettsvern i den gjeldande planen.

Artikkelen er publisert 22/05-2012