Vest-Telemark Blad

Les VTB elektronisk!

No er me på alle plattformer.

Papir - Lesebrett Mobil - PC/Mac

Seier det med rundballar

Mobiliserte: Flatdalsbøndene plasserte ut rundballar i Flatdal og Seljord med klar bodskap til Regjeringa. Frå venstre: Gunleik Mæland, Gudmund Mangerud, Lars Halvor Byberg, Odd Arne Byberg, Kjell A. Sølverød, Vigdis Opsund og Turid Opsund Mæland med Olav (1) på armen.

Sundag viste flatdalsbønder kva dei meiner om statens tilbod i jordbruksoppgjeret. Rundballar med tekst blei plassert ut i både Flatdal og Seljord.

Laurdag braut landbrukets organisasjonar forhandlingane om jordbruksavtale med staten. Tilbodet om 13.000 kroner meir per årsverk gav ikkje grunnlag for vidare forhandlingar, meinte forhandlingsleiar og leiar i Noregs bondelag, Nils T. Bjørke. Kravet frå bøndene var 51.000 kroner per årsverk.

– Jens må bestemme seg
Bøndene meiner Regjeringa ikkje tek Stortingets vedtak om auka matproduksjon på alvor. I Telemark har det vore aksjonar fleire stadar for å få merksemd om saka. Både i Flatdal og i Seljord blei det plassert ut rundballar med ulike tekstar og bilde av statsminister Jens Stoltenberg.
– Nå må Jens bestemme seg om han vil ha eit norsk landbruk, seier flatdalsbøndene i Seljord bondelag som aksjonerte sundag.
Kjell A. Sølverød, leiar i Telemark bondelag, tok turen til Seljord, og han var imponert over initiativet i lokallaget. Bøndene håpa at den nye landbruksmeldinga skulle gje nytt driv i norsk landbruk, men Sølverød meiner årets jordbruksoppgjer langt på veg er å kaste meldinga på bålet.
– Me trudde på ein ny giv i landbruket, men fekk dette midt i trynet i staden. Me blir hengande etter. Andre grupper ser ut til å få meir enn 17.000 kroner ekstra i år, seier leiaren.

Trivst i jobben
– Dette aksepterer me ikkje. Me har venta lenge. Nå er det nok, seier Gunleik Mæland (25), leiar i Seljord bondelag.
Han byrja frå botn som gardbrukar som 19-åring, og har måtta jobbe beinhardt ved sida av for å få det til å gå rundt. Mæland peikar på at marginale inntekter ikkje gjev rom for investeringar.
– Eg hadde ikkje trudd det kom til å vere som det blei, og trudde yrket var til å leve av. Eg trivst veldig godt i jobben, men er spent på framtida, seier han.
Sølverød og Mæland viser til at bygder gror att.
– Me må ta vare på matproduksjonen me har, før han blir øydelagt, seier dei.

– Godt tilbod
Bøndene vil ikkje leggje skulda på Senterpartiet og landbruksminister Lars Peder Brekk åleine.
– Me skuldar på Regjeringa. Dei innfrir ikkje i høve den nye landbruksmeldinga, seier Sølverød og Mæland.
Det totale tilbodet frå staten var på 900 millionar kroner, medan kravet frå bøndene var på 2,2 milliardar.
– Landbruket har fått eit godt tilbod. Organisasjonane veit også at me hadde ein god del meir å gje i forhandlingar. Derfor meiner eg det er ekstra beklageleg at dei vel å bryte utan å forhandle, kommenterer Lars Peder Brekk.
Brotet gjer at jordbruksoppgjeret går direkte til Stortinget for endeleg vedtak.

Artikkelen er publisert 15/05-2012