Vest-Telemark Blad

Les VTB elektronisk!

No er me på alle plattformer.

Papir - Lesebrett Mobil - PC/Mac

Saman for lyntog

Høgfartsbane: Lyntogkonferansen i Oslo fredag tek sikte på å gjera synleg andre alternativ til høgfartsbaneutgreiinga til Jernbaneverket. (Illustrasjonsfoto: David Gubler)

Fredag inviterer representantar for næringslivet i store delar av Sør-Noreg til lyntogkonferanse i Oslo. Målet er å synleggjera alternative lyntogløysingar.

Randi Berdal Hagen
randi@vtb.no

I januar kom Jernbaneverket med utgreiinga si om høgfartsbanar i Noreg. Regjeringa har over eitt år på seg til å vurdere utgreiinga, før dei skal koma med framlegg i Nasjonal transportplan (NTP) i 2013.
Målet med lyntogkonferansen er å gjera synleg andre alternativ enn det Jernbaneverket har lagt fram, å auke kunnskapen mellom transport og auka samfunnsutvikling, og å oppmode styresmaktene om å drive ein samferdslepolitikk som bidreg til vekst og verdiskaping over heile landet. Vest-Telemark næringsutvikling (VTNU) er ein av arrangørane av konferansen.
Selskapet Deutsche Bahn International har gjennom fleire år gjort grundige analyser og utarbeidd planar for lyntog i Noreg. Utgreiinga skil seg frå Jernbaneverket si lyntogutgreiing mellom anna ved å inkludere godstrafikk, regionaltrafikk med mange stasjonar undervegs og heile intercity-trafikken på Austlandet.

– Viktig for Telemark
Deutsche Bahn vil leggje fram resultata av sine granskingar og planar når det gjeld etablering og drift av høgfartsbanar i Noreg, som ein del av eit mangfaldig konferanseprogram. Jernbaneverket såg bort frå Deutsche Bahns planar i høgfartsutgreiinga dei kom med i januar i år.
Mellom anna er Haukelibanen, eller Vestlandsbanen, mellom Oslo og Bergen/Haugesund/Stavanger grundig utgreidd av Deutsche Bahn. Jørg Westermann i Norsk Bane, som gav Deutsche Bahn oppdraget med å greie ut traseane, skal halde innlegg på konferansen.
For mange i Telemark er planarbeidet av svært stor interesse. Dersom konseptet frå Deutsche Bahn blir lagt til grunn for ei framtidig satsing på lyntog, vil så å seia heile Telemark bli knytt opp til eit høgfartsnett.
– Dette høgfartskonseptet vil gje om lag 80% av innbyggarane i Noreg tilgang på lyntog i nærleiken av der dei bur. Det er eit fleirbrukskonsept som gjev eit positivt samfunnsøkonomisk rekneskap, og driftsøkonomien syner eit overskot som vil kunne finansiere store delar av investeringane i både togmateriell og infrastruktur, skriv arrangørane i ei pressemelding.

Lyntogkonferansen
– Blir arrangert fredag 11. mai i Oslo.
– Føremål: Gjera synleg andre alternativ til lyntogutgreiinga til Jernbaneverket. Å auke kunnskapen mellom transport og auka samfunnsutvikling, og å oppmode styresmaktene om å drive ein samferdslepolitikk som bidreg til vekst og verdiskaping over heile landet.
– Arrangørarar: Næringsforeningen i Trondheimsregionen, Næringsforeningen i Stavanger-regionen, Næringsforeningen i Kristiansandsregionen, Haugesundregionens næringsforening, Bergen Næringsråd, Aalesunds Handelsforening, Oslo Handelskammer, Oslo Handelsstands forening, Vest-Telemark næringsutvikling.

Artikkelen er publisert 08/05-2012