Vest-Telemark Blad

Les VTB elektronisk!

No er me på alle plattformer.

Papir - Lesebrett Mobil - PC/Mac

– Misvisande snøskuterutspel

Avviser: Sigvald Oppebøen Hansen opplyser at Ap ikkje har tatt endeleg stilling til innhaldet i eventuelle endringar i forskrifta om motorferdsel i utmark.

Torsdag kveld sende Sp ut pressemelding om at partiet gler seg over at Ap har snudd i snøskuterpolitikken.
– Sp jublar over at Ap no vil gje kommunane auka ansvar for motorferdsel i utmark, uttaler Erling Sande, Sp sin talsmann på området.
Nissedøl og stortingsrepresentant Sigvald Oppebøen Hansen (Ap) seier til VTB at pressemeldinga frå Sp er misvisande. Snøskutersaka har ikkje blitt behandla av stortingsgruppa til Ap seinare tida.
– Ap har ikkje tatt endeleg stilling til innhaldet i eventuelle endringar i forskrifta om motorferdsel i utmark. Men me har skuva på for at den nye miljøvernministeren Bård Vegard Solhjell (SV) må ta tak i saka og få ho avklart. Ap har kome med gode innspel til statsråden som er i tråd med det forsøkskommunane opererer med om lokal forvalting, seier Oppebøen Hansen.
Han minner om at Telemark Ap heile tida har ynskt lokal forvalting av snøskuterpolitikken, og at stortingsgruppa til Ap hadde ein slik intensjon for fem år sidan.
– Det er ikkje tvil om at Ap har vore pådrivar for å få ei avgjerd i Miljøverndepartementet. Eg håpar no på ei rask avklaring og har også tru på det. Eg er ganske utolmodig i forhold til å få avklaringa, seier Oppebøen Hansen.
VTB konfronterer Erling Sande med at Oppebøen Hansen seier stortingsgruppa til Ap ikkje har hatt saka oppe i seinare tid. Sande seier utspelet kom frå Sp etter at han leste at ein Ap-representant på landsmøtet til Utmarkskommunanes samanslutning denne veka skal ha sagt at Ap vil gje kommunane auka ansvar for motorferdsel i utmark.
– Eg håper ikkje Sp har jubla for tidleg, og no må me bare jobbe vidare for å få forståing for saka, seier Sande.

Artikkelen er publisert 21/04-2012