Vest-Telemark Blad

Les VTB elektronisk!

No er me på alle plattformer.

Papir - Lesebrett Mobil - PC/Mac

Reagerte på misleghald av buplikta

Vel å selje: Før Nissedal formannskap sommaren 2010 på ny sa nei til konsesjon utan buplikt, blei garden synfart saman med Jon Arild Resen-Fellie. No skal eigedomen seljast.

Nissedal formannskap meiner Jon Arild Resen-Fellie har brote vilkår etter å ha overteke ein gard på Felle. No blir eigedomen selt.

Eit samrøystes formannskap i Nissedal ser misleghaldet av buplikta som vesentlege brot på konsesjonsvilkåra sett av Fylkesmannen, og trekkjer tilbake konsesjonen til Jon Arild Resen-Fellie på Felle austgarden. Vedtaket blir endra dersom det ligg føre dokumentasjon på eit eigarskifte innan utgangen av juni 2012.
Grunngjevinga for at misleghaldet er vesentleg er at bupliktsaka har gått over fleire år, og at søkjar visste om siste frist for busetting. Det er vist lite initiativ for å setje våningshuset i stand etter vasskaden, og i beste fall vil det gå minst seks månader over fristen før ny eigar kan overta.

Styringssignal
– No meiner rådmannen nok er nok i denne saka. Det er viktig å stå sterkt bak rådmannen, og eg håper på eit samrøystes vedtak, innleia ordførar Halvor Homme (Ap) saka som det ikkje var fyrste gongen formannskapet diskuterte.
– Eg stør tilrådinga. Saka har drygt, drygt og drygt, og det er greitt at me set foten ned, sa Øyvind Tveit (KrF).
– Formannskapet må gå for tilrådinga for å gje gode styringssignal, sa Anne-Nora Oma Dahle (Sp), like før ordføraren klubba inn vedtaket.

Krav om busetting
I september 2010 gjorde Fylkesmannen eit endeleg vedtak om at Resen-Fellie fekk frist til utgangen av 2011 med å oppfylle buplikta på garden anten ved å bu der sjølv eller leige ut til heilårsbustad.
20. januar i år undra landbrukskontoret kva alternativ som var valt for busetting. Resen-Fellie svara ikkje innan fristen. Då varsla landbrukskontoret at kommunen meinte å ha grunnlag for å fastslå vesentlege brot på konsesjonsvilkåra.
I tilbakemelding som kom fyrst 21. februar opplyste Resen-Fellie at huset er under restaurering, men at det er problem med forsikringsoppgjeret etter vasskaden og at det for tida ikkje er mogleg å bu i bygget.
– Når styresmaktene sette fristen til 31. desember 2011 med å flytte til garden eller påsjå at andre flytta dit, måtte styresmaktene forstå at ein slik frist var umogleg. Bare restaureringsarbeidet er rekna til meir enn 1,5 år. I tillegg skal det skaffast eigna bygningsfolk til å gjere jobben, skriv Resen-Fellie på papir frå advokatfirmaet han jobbar i.

Overtok i 2001
Resen-Fellie syntest det er trist og rettsleg uakseptabelt at Nissedal kommune ut frå ovannemnte situasjon legg til grunn at konsesjonsvilkåra er brotne, og pålegg han å selje garden.
– Eg ynskjer likevel ikkje å kjempe vidare for eigedomen når kommunen heller ikkje ynskjer at han skal settast i stand slik at det kan bu folk der. Eg vel derfor å selje eigedomen, og vil truleg finne ein kjøpar slik at ny eigar har overtatt innan juni månad 2012, konkluderer Resen-Fellie.
Han overtok Felle austgarden i juli 2001. Etter to utsetjingsvedtak fekk eigaren frist fram til 2009 med å busetje seg. Juni 2009 blei vasskaden i våningshuset konstatert. I 2010 søkte Resen-Fellie om konsesjon utan busetjing. Saka gjekk heilt til Fylkesmannen, som altså sette frist til sist nyttår for busetting på eigedomen.

Artikkelen er publisert 19/04-2012