17/5-2012
Utgjevingar:
Vest-Telemark blad
Postboks 33
3836 Kviteseid
Tlf. 35 06 88 00
Faks 35 05 31 71
SMS/MMS: Kodeord VTB til 1963
E-postadresser:
redaksjon@vtb.no
annonse@vtb.no
Tysdag, torsdag og laurdag
– Det er totalarroganse
 Tungt: – Det er vanskeleg å få folk til å satse på sau når slikt skjer, seier leiar i Telemark sau og geit, Erik H. Håtveit, om halveringa av gaupekvoten og store sauetap på grunn av gaupe. |
Tysdag sat styret i Telemark sau og geit (TSG) saman då mobiltelefonane blei raudglødane.
– Me visste ingenting om reduksjonen av gaupekvoten. Me blei rett og slett oppgjevne og slått ut, sukkar leiar i Telemark sau og geit, Erik H. Håtveit frå Morgedal.
Rovviltnemnda la opp til ei jakt på 32 dyr, medan Miljøverndepartementet (MD) tysdag vedtok å redusere årets jaktkvote på gaupe til 15 for region 2 (Telemark, Buskerud, Vestfold og Aust-Agder). Totalt blei vedtaket frå rovviltnemndene felling av 157 gauper i Norge i 2012, tysdag redusert MD landstalet til 118 dyr.
– Ikkje fagleg grunngjeve
Håtveit reagerer sterkt på at gaupekvoten nå er redusert til bare to gauper for Vinje, Tokke og Kviteseid kommunar. Han viser til at gaupestamma ikkje har kome ned i bestandsmålet trass i at kvoten har vore over 30 dei siste åra.
– Halveringa av kvoten, som nå skjedde, er ikkje fagleg grunngjeve, noko som er veldig, veldig alvorleg. Fellingskvoten på to dyr for området vårt er alt for lite, me skulle hatt ni gauper bare for desse tri kommunane, meiner Håtveit, og peikar på at TSG meinte at kvoten for region 2 var for liten før Miljøverndepartementet raserte han til 15 dyr.
– Vedtaket som blei gjort onsdag har ikkje bare overprøva rovviltnemnda, men au faginstansane i fylket. Det er total arroganse frå den ekstreme venstresida i norsk politikk overfor demokratiske spelereglar i rovviltforvaltninga, seier Håtveit.
Han blir overraska om Stortinget godtar at regjeringa overser rovviltforliket og undrar på om dei vil tråkke på lokaldemokrati og vedtekne forvaltningsmetodar som landbruket og Stortinget har vore samde om.
– Me i landbruket godtar det i alle fall ikkje. Om Stoltenberg ikkje har tenkt å bli arbeidsledig etter valet må SV ut av det raudgrøne samarbeidet. Miljøvernminister Erik Solheim og statssekretær Heidi Sørensen har lagt godt til rette for det nå, seier Håtveit.
– Regjering og storting har moralsk plikt til å sjå at norsk landbruk produserar så mykje menneskemat som mogleg på dei ressursane me har i Noreg, seier Håtveit.
Store lammetap
Håtveit viser til at Bioforsk har vitenskapleg bevist at gaupa drep 93 prosent av lamma som døyr på beite. Og frå 2010 til 2011 har talet på sauedrap av gaupe auka i Telemark.
– Dette syner at gaupestamma er for stor, og fellingskvotane for små. Gaupa er ingen utryddingstruga dyreart. Finland og Russland har store bestandar av gaupe i område ho ikkje gjer skade. Bernkonvensjonen forpliktar ikkje Noreg til å ha eiga stamme av dei store rovdyra, seier Håtveit.
– Det er vanskeleg å få folk til å satse på sau når slikt skjer. Signala me får er at det ikkje er ynskjeleg med sau, men gaupe, seier Håtveit oppgjeven.
Kan bli tjuvjakt
– Kva tenker du om gaupejakta som starta i går?
– Eg oppfordrar ikkje til tjuvjakt ut over kvoten som er gjeven, men eg trur det vil skje. Då har staten mista forvaltninga, seier Håtveit.
Provoserte bønder og småbrukarar
Olav Langåsdalen, sekretær i Telemark Bonde- og småbrukarlag, er provosert av Miljøverndepartementets omgjering av gaupekvoten.
– Når Miljøverndepartementet overprøvar både Fylkesmannens miljøvernavdeling og rovviltnemndene, er det ein demonstrasjon av revirhevding frå departementet. Når bestandsmålet av gaupe er nådd for dei siste tri åra, er det rovviltnemndas rett å avgjera jaktkvoten. Dessutan er det liten skilnad på innstillinga frå Fylkesmannen på 30 dyr, og rovviltnemndas på 28 pluss ein reserve på fire, seier Langåsdalen.
Det er tydeleg usemje om kor stor bestanden av gaupe er. Langåsdalen meiner både DN (Direktoratet for naturforvaltning) og departementet er klar over at reknemodellen for bestanden er usikker på regionalt nivå.
– Eg er sikker på at Fylkesmannens folk lokalt har betre oversikt over bestanden lokalt enn DN og departementet, seier Langåsdalen.
I tillegg til at reduksjonen i jaktkvoten provoserer, meiner Langåsdalen i Småbrukarlaget at departementet legg opp til å auke konfliktnivået mellom beitedyr og rovdyr.
– Det er også tragisk fordi Fylkesmannen, altså staten, og fylkeskommunen i Telemark har løyvd pengar til eit saueprosjekt, som har som mål å auke talet på besetningar, og talet på dyr. Det harmonerer dårleg med politikken frå regjeringspartia, som alle tri er samde om å leggje til rette for auka vilkår for landbruket.
Reaksjonen frå leiaren i Telemark Bondelag, Kjell Sølverød, var heller ikkje nådig:
– I dag er eg rett og slett forbanna.
Dette er ei innskrenking av sjølvråderetten, ei sakshandsaming og ei overkøyring av demokratiske styringsmodellar som er heilt uakseptable, seier han på heimesida til Bondelaget.
Sølverød er førebudd på, og klar for eit nasjonalt opprør. Eit opprør mot overstyring og innskrenking av den lokale og regionale sjølvråderetten. Stikk i mot det som er vedteke i Nasjonalforsamlinga.
– Dette er meir enn alvorleg, avsluttar leiaren i Telemark Bondelag.
Olav Langåsdalen seier Småbrukarlaget er fullt ut samstemt med Bondelaget i det som måtte bli av aksjonar mot departementets avgjerd.
– Eg går meir enn gjerne i demonstrasjonstog – og stiller gjerne med traktor, seier Langåsdalen.
Artikkelen er publisert 02/02-2012
Aktuelle saker:
Trur Vrådal brygge blir ei perle
Seier det med rundballar
– Lyntog vil skape paradigmeskifte
Midtpunkt i TV-serie
– Lyntog løner seg
Den heimvendte pedagogen
Ein livsstil – ikkje eit vanleg yrke
Nakne flaggstenger
Frøken president
