5/2-2012
Utgjevingar:
Vest-Telemark blad
Postboks 33
3836 Kviteseid
Tlf. 35 06 88 00
Faks 35 05 31 71
SMS/MMS: Kodeord VTB til 1963
E-postadresser:
redaksjon@vtb.no
annonse@vtb.no
Tysdag, torsdag og laurdag
Aktiv helg
 Ein og to: Kjell Einar Erikstein (t.v.) frå Vinje måtte sjå seg slått av Jan Holte Karlsen frå Snøgg friidrett i terrengløpet i Rauland laurdag. |
Knut-Harald Semb frå Herkules blei historisk då han som fyrstemann kryssa målstreken i Rauland sentrum etter å ha bruka 1 time 13 minuttar og 53 sekundar frå starten ved Skinnarbu.
144 menn og kvinner stilte til start i den lengste løypa, halvmaraton på 21 kilometer, frå Skinnarbu til Rauland sentrum. Den tidlegare langrennsløparen Aslak Fisketjønn frå Morgedal viste laurdag at han held forma vedlike. Fisketjønn kom i mål som nummer fire, vel fire minuttar bak vinnaren. 18 år gamle Håkon Lie frå Åmdal IL blei totalt nummer elleve i asfaltløpet.
Ingjerd Kleiv Utistog frå Vinje IL var beste vesttelen i kvinneklassa. Ho blei nummer tri blant kvinnene og 18. plass totalt. Turi Malme frå Hitra vann kvinneklassa.
Brør imponerte
I tillegg til halvmaraton var det ein alternativ ti kilometer trasé i terrenget med start og mål i sentrum. Skibrørne Kjell Einar og Knut Halvor Erikstein frå Vinje var blant dei som imponerte i terrenget. 17 år gamle Kjell Einar var den som kom nærmast vinnaren Jan Holte Karlsen frå Snøgg friidrett. Erikstein var berre ni sekundar bak Notodden-løparen.
– Det var tungt, men eg synest det gjekk fint, oppsummerer Kjell Einar Erikstein.
Holte Karlsen stakk tidleg frå i tet og leda med 40 sekundar då løparane kom til skogterrenget.
– Eg visste eg ikkje var så sterk i terrenget og ynskte derfor ei god luke før me kom dit. Då me kom til gruspartiet var me likt, og planen var å liggje i ryggen på Kjell Einar før eg sette inn støtet. Det fungerte, og eg er godt fornøgd med det som må karakteriserast som ein taktisk triumf, seier Holte Karlsen.
– Eg er godt fornøgd med løpet, men merka det veldig i beina i bakkane ned ved Attføringssenteret, seier den eldste av Erikstein-brørne.
Knut Halvor (16) var også godt fornøgd med løpet. Ungguten kom i mål på ein sterk fjerdeplass.
– Låra sa farvel også for meg i nedoverbakkane ned ved AiR, men eg fekk ekstra motivasjon at eg tok innpå han som låg på tredjeplass, seier yngstemann Erikstein, som i mål var fire sekundar bak Håvard Toft Larsen frå Birkenes på tredjeplass.
Trippelarrangement
Helteløpet er ein del av trippelarrangementet Telemarkhelten. Frå før er Helterittet på sykkel arrangert. I vinter er det klart for Helterennet på ski. Jan Holte Karlsen er imponert over arrangementet. Han blei nummer to samanlagt i sykkelrittet for nokre veker sidan. I Rauland følte han seg nesten på heimebane.
– Eg har ferieleilegheit her på Rauland, seier han.
– Det var eit veldig bra arrangement, og eg vil rette ein stor takk til arrangøren. Løpet er alt det største i Telemark, og neste år vil det bli endå fleire deltakarar, føler Holte Karlsen seg trygg på.
I kvinneklassa blei Anne Margit Urbø frå Åmdal IL beste vesttele på 9. plass. Ho var 11 minutt og 43 sekundar bak Pia Sofie Måbø frå Stathelle som vann klassa.
For dei som valte terrengløypa var det også ei eiga trimklasse utan tidtaking.
Medan hardhausane var ute og sprang på asfalt og i skogen var det barneløp, Barnehelten, i sentrum.
Arrangørane hadde mål om 150 deltakarar. Det kom 470.
– Me er veldig fornøgde, seier prosjektleiar Christian Sønstebø.
– Me såg at halvmaratonen over fjellet var tøft, men det gav deltakarane ei god sportsleg oppleving. Me lova «rå natur – rå utfordringar» og viste at me heldt ord, seier Aud Irene Kittelsen som er ansvarleg for Helteløpet og Helterennet.
Artikkelen er publisert 07/09-2010
Aktuelle saker:
– Fylg hjarta, lysta og engasjementet
– Er betenkt over forskjellsbehandlinga
Styrer framtida
Eit enklare liv for sauebonden
Einaste aktøren med helgekurs
– Det er totalarroganse
Unikt skatehotell
Vil ha rovviltforvaltinga til Landbruksdepartementet
Den siste visitasen
