5/2-2012
Utgjevingar:
Vest-Telemark blad
Postboks 33
3836 Kviteseid
Tlf. 35 06 88 00
Faks 35 05 31 71
SMS/MMS: Kodeord VTB til 1963
E-postadresser:
redaksjon@vtb.no
annonse@vtb.no
Tysdag, torsdag og laurdag
Vil berre ha eitt lensmannskontor
 Ny struktur: Politimeister Anne Rygh Pedersen har vitja alle kommunestyra, som her i Seljord, i samband med omorganiseringa av polititenesta i Vest-Telemark. Ho meiner eitt kontor er nok. (Foto: Øystein Øygarden) |
Kviteseid-lensmannen har greidd ut den framtidige politistrukturen i Vest-Telemark på oppdrag frå politimeister Anne Rygh Pedersen. Geir Kjartan Lid fortel til VTB at rapporten no er levert politimeisteren. Ho skal vurdere rapporten internt før han kjem på høyring til kommunane i regionen.
– Me har bestemt at det er politimeisteren som skal uttale seg om innhaldet, fortel Lid.
– Kan du stadfeste at du gjer framlegg om eitt lensmannskontor lokalisert til Kviteseid?
– Ja, eg har skissert dette som den optimale løysinga for å løyse dei politifaglege oppgåvene best mogleg. Men eg har også med eit alternativ, seier lensmannen.
– Kva er alternativet ditt?
– Det må politimeisteren svare på, seier Lid.
Utfordrande oppgåve
Lid vedgår at det har vore strid om korleis politiet bør organisere seg i Vest-Telemark for å gje eit best mogleg tilbod til innbyggjarane. vedgår Men han har samstundes funne oppgåva utfordrande, spennande og interessant. Undervegs har han vore litt oppgjeven av at så mange har uttala seg, og då stort sett om kva geografisk adresse politiet skal ha i regionen.
Det lukkast ikkje VTB å få politimeister Anne Rygh Pedersen i tale i går. Men ho har signalisert at ho held fast ved det ho tidlegare har signalisert, nemleg at det ikkje er plass til meir enn eitt lensmannskontor i Vest-Telemark. Ho meiner det viktigaste for innbyggjarane er at politiet har folk til å rykke ut når noko skjer i regionen.
Regionen samla
Dersom løysinga lensmann Geir Kjartan Lid meiner er den optimale vert fylgt opp og vedteken av regjeringa, vil dagens lensmannskontor i Vinje, Tokke, Fyresdal, Seljord og Nissedal låse dørene. Seljord høyrer i dag under Midt-Telemark i Bø, medan Nissedal ligg under Vestmar saman med Drangedal og Kragerø. No er føresetnaden å samle alle Vest-Telemark-kommunane i ein og same politiregion.
Politimeisteren har også undervegs i utgreiingsprosessen stadfesta at dei ressursane dagens seks lensmannskontor har, ikkje vert redusert ved ei samanslåing. Kontora har til saman 15 politistillingsheimlar inkludert lensmennene, og 5 kontorstillingar. Lensmannskontora disponerer totalt 7 bilar og 2 snøskutarar.
Lokal nærleik
Regionordførar Anne-Nora Oma Dahle er ikkje begeistra for ei løysing med berre eitt lensmannskontor i Vest-Telemark. Ho grunngjev det med dei store avstandane det er i regionen. Oma Dahle ho trur på at det beste for innbyggjarane tryggleikskjensle er å ha politi stasjonert på kontor i nærleiken.
– I utgangspunktet er eg overtydd om at både me som politikarar og politiet har eit felles mål; gje eit godt polititenestetilbod til innbyggjarane i Vest-Telemark. Eg kan ikkje forstå at folk vil oppleve det som ei forbetring av polititenesta om alt vert sentralisert til eitt lensmannskontor, seier regionordføraren.
Oma Dahle nemner elles at det under utgreiingsarbeidet kom fram at det er vid skilnad på kva politikarane og politiet legg i omgrepet prosess.
– Når me snakkar om prosess i ei arbeidsgruppe har det ein annan definisjon enn kva politiet praktiserer, meiner regionordførar Anne-Nora Oma Dahle.
Fleirtalet i VTNF-styret er kritiske
Olav A. Veum, dagleg leiar i VTNF har vore observatør i arbeidsgruppa til lensmann Lid på vegne av næringslivet. Han fortel at VTNF avventar den endelege rapporten som politimeisteren skal sende på høyring.
– Saka om politistrukturen har me lufta rundt styrebordet. Haldninga er delte blant styremedlemmane, og eg kan alt no konkludere med at næringslivet i Vest-Telemark ikkje vil einast i ei felles uttale, seier Veum.
VTNF vil spørje medlemmane om deira synspunkt til lokaliseringa av polititenesta i framtida, men det vil ikkje skje før den formelle høyringa.
Rekruttering
Næringslivet er oppteken av å styrke kompetansen og profesjonaliseringa til politiet i regionen, og at etaten har ein struktur som gjer det mogleg å rekruttere kompetent arbeidskraft. VTNF-styret meiner elles at det tidsmessig må vere ein rimeleg tilgang til politietaten i høve til dei geografiske avstandane i Vest-Telemark.
Lokalisering
– I styret kom det fram ein veldig skepsis frå dei delane av styret som er knytt til Seljord og Vinje til framlegget om å lokalisere eit felles lensmannskontor til Kviteseid. Argumentet var mellom anna at lokaliseringa bør vere i sentrale vekstområde langs E 134. Frå Nissedal og Fyresdal er signala at meir enn ein times køyring frå lensmannskontoret ikkje er akseptabelt, nemner Veum.
VTNF-leiaren seier han innser at det ikkje vert mogleg for næringslivet å tale med ei tunge når dei skal gje uttale om korleis det lokale politiet skal vere organisert og lokalisert i åra framover.
Artikkelen er publisert 21/08-2010
Aktuelle saker:
– Fylg hjarta, lysta og engasjementet
– Er betenkt over forskjellsbehandlinga
Styrer framtida
Eit enklare liv for sauebonden
Einaste aktøren med helgekurs
– Det er totalarroganse
Unikt skatehotell
Vil ha rovviltforvaltinga til Landbruksdepartementet
Den siste visitasen
