5/2-2012
Utgjevingar:
Vest-Telemark blad
Postboks 33
3836 Kviteseid
Tlf. 35 06 88 00
Faks 35 05 31 71
SMS/MMS: Kodeord VTB til 1963
E-postadresser:
redaksjon@vtb.no
annonse@vtb.no
Tysdag, torsdag og laurdag
Opptur for motbakkeløp
 Det var tøffe duellar under motbakkeløpet i Treungen laurdag. Her knivar Svein Olav Utistog og Jann Olav Tjønneland om sigeren i herreklassa. |
Alt frå klokka ti om føremiddagen var det høve for mosjonistane å starte klatreetappen mot toppen av Skuggenatten. Rundt 100 deltakarar hadde registrert seg i mosjonsklassa. I tillegg var det mange som gjekk utan å registrere seg. Primus motor for motbakkeløpet, Olav Nilsen, var strålande nøgd med deltakinga.
– Sidan dette er fyrste gongen me arrangerer løpet var me usikre på kor mange me kunne forvente til start. At over 100 personar registrerte seg i mosjonsklassene er glimrande. Endå betre er det at det stilte 30 ungdommar til start i konkurranseklassa 13-19 år, smiler Nilsen.
Møtte slekt
Bladfyken starta den om lag 4,5 kilometer lange turen i god tid før konkurranseløparane som starta klokka eitt. Etter nokre kilometer blei eg teken att av Harald Valle frå Nissedal. Skulemannen og skøyaren var lett på foten, og praten gjekk lett. Ja, han gjekk så lett at me fann ut me var i slekt. Men så var det slutt, Valle sette opp farten og borte var han ...
Tøffe stigningar
Motbakkeløpet startar ved fotballbanen i Treungen, og løypa går om lag ein kilometer i ganske lett terreng langs ein grusveg og på nesten slett svaberg. Men så kjem stigningane og kastar seg over deg. Om lag 450 høgdemeter fordelt på noko over tri kilometer seier sitt. Stykket opp til den fyrste masta er nok den hardaste. Etter kvart blir det litt meir kupert, og det er høve til å unngå mjølkesyra. Heile turen er veldig flott, og det er ein storslegen natur å sjå rundt seg på veg oppover. Å gå på svaberga og nyte utsikten ut over Treungen og omkrins var vel verdt turen for bladfyken som altså gjekk i mosjonsklassa.
Stor stemning
– Me er godt fornøgde med arrangementet, og me hadde ein alternativ plan klar om det skulle bli regn. Då kunne nok fjellet blitt vel glatt og me hadde då sprunge Skuggenatten rundt i staden, forklarer Nilsen.
Stemninga på toppen av Skuggenatten (706 moh) var stor då konkurranseløparane kom. Dei fleste av mosjonistane stod nemleg på toppen og tok i mot dei djerve karane og kvendi som konkurrerte opp dei bratte liene.
Nesten uavgjort
Fellesstarten klokka eitt samla altså i overkant av 70 deltakarar av båe kjønn. Yngste klasse var 13-15 år, og eldste var 70+. Etter vel 27 minuttar kom det to løparar opp mot målstreken. Svein Olav Utistog frå Byrte og Jann Olav Tjønneland frå Viksdalen IL kom rett etter kvarandre med Utistog fyrst. Eit par meter før målseglet skulle brytast, går Tjønneland på innsida av Utistog og dermed blei han dømt fyrst i mål. Eit durabeleg oppgjer enda altså så godt som uavgjort. Tjønneland fekk tida 27,03. Utistog fekk notert eit sekund dårlegare tid.
– Det var litt surt, og eg synest vel kanskje me var likt over streken. Men eg er i alle fall godt fornøgd med sjølve løpet. Eg starta litt forsiktig og låg faktisk 20 sekundar bak teten ved den fyrste masta. Så drog eg innpå og fekk faktisk ei luke før eg blei henta inn att no på slutten, forklarer Utistog.
Endå meir imponerande var ungguten Ole-Petter Fjeld frå Oseberg skilag. 15-åringen blei totalt nummer tri, berre 17 sekundar etter vinnaren.
Beste vesttele utan Utistog blei Eivind R. Kvaale frå Høydalsmo som vann klasse G16-19 med tida 29,09. I kvinneklassene stilte Ingjerd Utistog Kleiv, Vinje, og Marie Kornmo Enger, Treungen til start, men båe måtte bryte. Vinnaren av dameklassa blei Brita Cecilie Mustad, Norcem bedriftsidrettslag, med tida 30,47.
Artikkelen er publisert 08/06-2010
Aktuelle saker:
– Fylg hjarta, lysta og engasjementet
– Er betenkt over forskjellsbehandlinga
Styrer framtida
Eit enklare liv for sauebonden
Einaste aktøren med helgekurs
– Det er totalarroganse
Unikt skatehotell
Vil ha rovviltforvaltinga til Landbruksdepartementet
Den siste visitasen
