7/9-2010
Vest-Telemark Blad
Postboks 33
3836 Kviteseid
Tlf. 35 06 88 00
Faks 35 05 31 71
SMS/MMS: Kodeord VTB til 1963
E-postadresser:
redaksjon@vtb.no
annonse@vtb.no
Utgjevingar:
Tysdag, torsdag og laurdag
Vekstkrafta er i eksisterande verksemder
 Marknadsføringa av Telemarkskanalen og turismen vart grundig diskutert på Vest-Telemarkkonferansen. Hotell- og skipseigar Thor Halvorsen (t.h.) drog opp debatten. Vidare mot venstre: regionordførar Anne-Nora Oma Dahle, næringssjef Nils Gjerde i Tokke og Bård Stranheim i IKT Grenland. |
Årets Vest-Telemarkkonferanse i Vrådal torsdag, den sjuande i rekka, hadde vekst i arbeidsplassar i regionen som tema. Hovudspørsmålet var om denne veksten burde kome i eksisterande verksemder eller gjennom nyetableringar. Olav A. Veum i VTNF peikte på at dagens næringsliv må utvikle seg, tilpasse seg og sikre lønsemd. På den måten meinte han det kan utviklast fleire attraktive arbeidsplassar.
– Det vil vere heilt vesentleg for framtida å leggje til rette for samhandling mellom verksemdene gjennom til dømes næringsklynger i regionen. Svært mange av dagens tilsette er pensjonistar i løpet av dei næraste fem til ti åra. Eg vil hevde me står framom ein eldretsunami. Dersom Vest-Telemark ikkje skal verte hekta av, må me trekkje til oss nye arbeidstakarar og gje desse attraktive jobbar, sa Veum.
Han kom med fleire døme på at regionen har stort potensial til å lukkast ved vidarteutvikling av reiselivssektoren og syte for vekst basert på lokale råvarer som mat, tre og energi.
I nærings-NM som Telemarksforsking utarbeider hamna Vest-Telemark på 79. plass av dei 83 regionane i Noreg. Tek ein i tillegg med attraksjon enda ein på 72. plass.
– Dersom me skal lyfte oss, må me tenkje regionalt for å utvikle næringslivet i Vest-Telemark, hevda Olav A. Veum.
Nyskaping i distrikta
Politikk for nyskaping i distrikta var tema for Terje Lien Aasland (Ap) – leiar av næringskomiteen på Stortinget. Han slo fast at viktige innsatsfaktorar som vasskraft, fiskeri, jord- og skogbruk, som alle er fornybare, er lokalisert i distrikta.
Mangel på risikokapital er ei utfordring for næringslivet i Vest-Telemark. Lien Aasland tok dette opp og konstaterte at problemet er knytt til både offentleg og privat kapital.
– Dei mange verkemidla gjennom det offentlege lever litt for mykje på kvar si tue. I framtida treng med ei betre integrering, slik at det er mogleg for næringsdrivande å finne fram i tilskots- og lånefloraen. Eg meiner tida er overmogen til å forenkle systemet. Verkemiddelapparatet ber preg av å vere meir politisk laga enn å tene næringslivets behov, vedgjekk Terje Lien Aasland.
Lysande fyrtårn
Novelda i Kviteseid og Skorve Entreprenør i Seljord vart trekt fram som to lysande døme på suksessfulle næringsetableringar dei seinare åra i Vest-Telemark.
Dag Wisland i Novelda fortalde at dei etablerte seg i 2004 og utviklar avanserte elektroniske brikker til ulike radarsystem. Utvikling og design skjer i Kviteseid og Oslo, medan sjølve produksjonen går føre seg i Østen. Novelda sel ikkje til sluttbrukarar, men til verksemder som produserer avanserte radarar til mellom anna medisinsk bruk og til ingeniørfag som bygg og anlegg.
Novelda har hatt 35-40 millionar kroner i utviklingskostnadar, 3 millionar kroner til produkttesting før dei no håper å erobre verdsmarknaden med den avanserte elektronikken sin.
– Me er til saman 17 tilsette i dag i Kviteseid og Oslo. Neste år reknar me med tilsetting av 4-5 nye høgkvalifiserte medarbeidarar. Desse kan gjerne få arbeidsplassen sin i Kviteseid, men det er ei stor utfordring å få folk til å flytte til Vest-Telemark, fortalde Dag Wisland.
Eventyrleg vekst
Per Ivar Magnushommen fortalde at dei var tri gründarar og 450.000 kroner i kapital som drog i gang Skorve Entreprenør i Seljord i 2005. Omsetnaden fyrste året enda på 26 millionar kroner og 11 tilsette. I 2009 sysselsette Skorve 48 personar, alle dugande snikkarar og ingeniørar heimehøyrande i Vest-Telemark og Midt-Telemark. Omsetninga i fjor enda på 110 millionar kroner.
– I ein tøff anbodsmarknad tener med pengar og har nok oppdrag. Skorve vart etablert utan fem øre i offentleg støtte, fortalde Magnushommen.
Regiondirektør Rolf Normann i Statkraft på Dalen har også bruk for mykje kvalifisert arbeidskraft dei komande ti åra.
– Me treng 50-60 personar innan ulike fagområde der gode realfagskunnskapar vil vere sentralt. Kraftverka i regionen nærmar seg 50 år, og vil utløyse store rehabiliteringsoppgåver framover. Dei næraste fire åra skal me bruke 950 millionar kroner på dette området, opplyste Rolf Normann.
Reiselivssatsing med entusiasme
Dalen Hotell jobbar no med eit reiselivsprodukt kalla «Slow travel» når «Henrik Ibsen» kjem i drift at på Telemarkskanalen i mai. Hoteleigar Thor Halvorsen såg for seg eit lyft for reiselivet i Vest-Telemark då han med stor og smittande entusiasme hadde innlegg på Vest-Telemarkkonferansen i Vrådal torsdag.
Thor Halvorsen forklarte forsamlinga kvifor han investerer i Vest-Telemark. Han overtok Dalen Hotell som han karakteriserte som eit nydeleg hotell det ikkje finst maken til. Alle dei 42 romma ligg i den gamle trebygningen, og ikkje i eit nybygg på baksida av ein gamal fasade. Det er tilfellet ved dei fleste gamle hotella i turist-Noreg.
– Det er ikkje noko problem å marknadsføre eit så lite hotell. Drifta ved Dalen Hotell går betre og betre. Ulempa er at bygget er trekkfullt og iskaldt grunna manglande isolasjon. Difor er heilårsdrift umogleg, minna Halvorsen om.
Han brukte mykje av innlegget sitt til å peika på at det er heilt avgjerande for hotellet at kanalbåtane kjem til Dalen kvar einaste dag i sesongen. Då Skien-Dalen Skipsselskap i 2009 la «Henrik Ibsen» i opplag og «Victoria» berre kom til Dalen to gongar i veka, karakterisere Thor Halvorsen som ein katastrofe for både hotellet og turisttrafikken til Dalen.
Stagnasjon utan kanalbåt
– Me kan ikkje utvikle oss vidare utan den daglege båten til og frå Dalen. Difor sette me mykje inn for å sikre «Henrik Ibsen» eit vidare liv. Med god hjelp av fylkesordførar Gunn Marit Helgesen overtok me den stolte skuta, bygt i Gøteborg i 1907, for ei krone. Det kostar millionar kroner å få båten i godkjent stand. No ligg ho i Tønsberg, men skal sigle gjennom slusene og opp til Dalen i byrjinga av mai, sa hotelleigaren som no også kan titulere seg som skipsreiar.
Thor Halvorsen la ikkje skjul på misnøye med marknadsføringa av Telemarkskanalen dei seinare åra. Han lanserte omgrepet «Slow travel» som eit satsingsområde frå sommaren. Turistane skal få oppleve ein båttur gjennom slusene og over dei store vatna i Vest-Telemark fram til Dalen. Halvorsen har ikkje tru på at båtturen tek for lang tid for dagens reisande.
Spektakulær natur
– Båtturen tek den tida han tek. Ombord skal det vere eit fyrsteklasses mat- og drikketilbod. Når me veit at kanalbåtane har hatt opp til 40.000 passasjerar årleg, men frakta berre 14.000 i 2009, fortel det meg at nokon må ha sove godt i timen. Turen over Bandak er som å sigle ut Geirangerfjorden. Me har like spektakulær natur langs Telemarkskanalen, så kvifor skal turistane reise over fjellet for å få ugløymelege naturopplevingar, undra Halvorsen.
Hotell- og båteigaren meinte ein må skape historie kring reiselivsprodukta for å få turistane til Vest-Telemark. Halvorsen var overtydd om at kombinasjonen unikt hotell, kanalen og båttrafikken, er nøkkelen for å få Dalen til å bløme som turistmål.
Betre marknadsføring
– Dette er ein kombinasjon det ikkje vil vere vanskeleg å selje. Men må seie tydeleg frå om kva me har. Difor er det viktig å få fart på Telemarksreiser som marknadsførar, og då må det pengar til. Det nyttar ikkje å la eit utarma reiseliv ta heile rekninga til marknadsføringa. Både politikarane og Innovasjon Noreg må på banen for å skaffe pengar til Telemarksreiser, slik at kraftfull marknadsføring kjem opp og står, poengterte Thor Halvorsen.
Artikkelen er publisert 06/02-2010
Aktuelle saker:
Aktiv helg
– Observatørrolla var eit spel for galleriet
– Tidenes mål på Åmot stadion
Sterke kulturkommunar
Omdømefokus i debatt om skulen
85.000 til vintermarknadsføring
Heskjeleg moro med hesjing
Presenterte framtidas sentrumsplan
Skieventyret selt til VTM for 1,8 millionar