Veks i verksemda gjev vekst i folketalet

Medan andre verksemder byggjer ned, utvidar forsikringskontoret til Gjensidige i Kviteseid. – Det er gledeleg å tilby arbeid slik at folk kan flytte heimatt, smiler dagleg leiar ved Gjensidige Kviteseid, Arne Ulstrup Jansen.

Jansen hadde tidlegare 2,6 årsverk ved kontoret i Kviteseidbyen. Då to av dei tilsette gjekk over til andre stillingar var det behov for å finne nye tilsette til forsikringsverksemda.

– Frå 1. august blir me tre tilsette ved kontoret att, alle i full stilling. Det er moro å utvide i tider der andre må nedbemanne. Mari Vik Aslestad frå Fyresdal, busett i Tokke, er utdanna økonom og har no gjennomført Gjensidigeskulen og er på plass på kontoret. 1. august startar også vrådølen Eric Johannsson som kjem frå salssenteret til Gjensidige i Skien. Han og sambuaren flyttar heim til Kviteseid frå Skien med to barn. Det er gledeleg å tilby arbeid slik at folk kan flytte tilbake til heimkommunen. Me treng fleire innbyggjarar i bygda vår, smiler Jansen nøgd.

Han er glad for at dei kan styrke kontoret, og seier det også er naudsynt for å gje kundane i heile Vest-Telemark eit godt tilbod.

Vil gjerne støtte fleire

I tillegg til å tilby ulike forsikringar er Jansen også oppteken av at innbyggjarane i Vest-Telemark må søkje midlar frå Gjensidigestiftinga. Han fortel mellom anna at frivilligsentralen i Fyresdal fekk 360 000 kroner, Lårdal vel fekk 208 000 kroner Birtedalen stiog løypelag fekk 200 000 kroner, frivilligsentralen i Nissedal fekk 79 000 og skulemusikken i Seljord 38 000 kroner i 2017.

– Nå er det berre å førebu søknadar. Gjensidigestiftinga støttar prosjekt som ligg innanfor dei fem satsingsområda tryggleik, mestring og læring, sosial inkludering og mangfald, fysisk aktivitet og kosthald. Stiftinga deler kvart år ut midlar til samfunnsnyttige føremål over heile landet, og eg skulle gjerne sett at det kom fleire søknadar frå våre kommunar, seier Jansen

– Alle friviljuge lag, organisasjonar og eldsjeler kan søke om midlar. Tidlegare har også mellom anna skileikanlegg, kunstgrasbanar, skiskyttaranlegg og gapahukar fått stønad, seier Jansen, og legg til at søknadsfristen er i september.

 

Tre millionar tilbake til kundar i Kviteseid

Gjensidiges kundar i Kviteseid får i år att 3 millionar kroner i kundeutbyte.

– Det er det største beløpet nokon gong, seier Arne Ulstrup Jansen.

– 2017 var eit godt år for Gjensidige, og difor kan me i år dele ut eit solid utbyte. I Gjensidige går mesteparten tilbake til kundane, melder konsernsjef i Gjensidige Helge Leiro Baastad.

Ein privatkunde får i år i snitt 1624 kroner i kundeutbyte.

Gjensidige har 800 000 kundar i Noreg, og dei får 2,2 milliardar kroner i kundeutbyte. Utbyttet er omtrent 14,4 prosent av det kundane betala i forsikring i fjor.

– Sidan me starta å dele overskotet med kundane i 2007, har kundane fått over 17 milliardar kroner i utbyte, seier Baastad.

– Men kvar kjem kundeutbyttet frå?

Den største eigaren i Gjensidige er den kundestyrte Gjensidigestiftinga. Stiftinga vidareformidlar heile aksjeutbyte frå Gjensidige til selskapets norske skadeforsikringskundar. Ordninga med Gjensidigestiftinga og kundeutbyte har historiske årsakar. På 1800-talet vart det danna mange små, lokale forsikringsselskap som var eigd av kundane. I nyare tid har nesten alle desse selskapa gått saman i Gjensidige.

– Gjensidigestiftinga vidarefører kundanes eigarskap, og det gjensidige forholdet mellom kundar, lokalsamfunn og forsikringsselskap, seier Baastad.

Av årets utbyte skal kundane i Telemark totalt dele 50 millionar kroner.

Kommune   Utbytte

Seljord     1 333 212

Kviteseid  2 846 305

Nissedal   1 092 806

Fyresdal   1 610 614

Tokke        2 237 102

Vinje         3 018 708