Ny deltakarrekord i Haukelirennet

1462 skiløparar sytte for at det 10. Haukelirennet fekk ny deltakarrekord i strålande solskin laurdag.

Vebjørn Turtveit frå Voss var fyrstemann over målstreken i det 32 kilometer lange Haukelirennet framfor OL-meister Simen Hegstad Krüger og fjorårets vinnar Sjur Røthe laurdag ettermiddag. Vinjes eigen Runar Skaug Mathisen gjekk inn til sjette beste tid i herreklassa.

I kvinneklassa gjekk Silje Øyre Slind, Oppdal IL, inn til ein solid siger to minutt før sylvvinnar Magni Smedås frå Lillehammer skiklubb og bronsevinnar Astrid Uhrenholdt Jacobsen, Heming IL. Marianne Hermansen frå arrangørklubben IL Rein, gjekk inn til fjerde beste tid i kvinneklassa. 

I Vennerennet var det 188 barn mellom 2 og 12 år som gjennomførte. Astrid Uhrenholdt Jacobsen og Sjur Røthe har gått med barna fleire gonger tidlegare, og stilte også i år som flotte førebilete for dei yngste saman med Hans Christer Holund og Simen Hegstad Krüger. 

113 ungdomsløparar stilte til start saman med hovudfeltet før dei gjennomførte den 12 kilometer lange løypa. Hanne Sløgestad, Vindbjart IL, var den sterkaste av jentene, medan Mathias Holbæk sikra sigeren hos gutane etter nokre uheldige fall blant dei raskaste løparane i den særs krevjande nedfarten mot mål. 

Ny rekord

Heile 1462 skiløparar deltok i rennet i strålande sol og nærast vindstille vêr laurdag, det er 201 fleire deltakarar enn då førre rekorden blei sett i 2016.

– Kvifor trur du så mange kjem til Haukeli? 

– Ei stabil og god vêrmelding har nok mykje å seie, og at me har eit godt arrangement. Det er hyggeleg når folk kjem tilbake år etter år, og det har vore jamn auke i talet på deltakarar heilt frå starten, seier rennleiar Trond Neri Flothyl frå arrangørklubben IL Rein. Men han legg til at det framleis er plass og kapasitet til langt fleire i det populære internasjonale turrennet. 

Dyktige dugnadsarbeidarar

Flothyl rosar dei vel 150 funksjonærane som bidreg til at alt frå rigging, logistikk, gjennomføring og nedrigging av dei ulike greinene av Haukelirennet går som smurt år etter år.

– Sjølvsagt har me nokre utfordringar i blant, Men det er ikkje vanskeleg å vere rennleiar når ein har så dyktige folk med seg. Eg trur Haukelirennet, med friviljug innsats for IL Rein og Vinje og Haukeli røde kors, er samlande for bygdene her oppe. Mange kjem saman for å skape noko hyggeleg i fellesskap. Og me opplever ei stolt og god stemning etter rennet, seier Flothyl.  

Eit renn for alle

Haukelirennet har blitt ein flott ski- og folkefest til fjells, og mange har fått årviss tradisjon med å gå rennet og stoppe opp i løypa for å heie fram dei aktive løparane. 

– Det er viktig for oss at dette skal vere eit renn der alle har det bra – det er målet vårt – både dei aktive løparane og dei som tar rennet som ein tur. Me får gode tilbakemeldingar frå mange, og dei aktive løparane seier at dei set pris på stemninga, heiagjengane som sit og rastar mest langs heile løypa og den flotte utsikten, seier Flothyl.