Gler seg til å jobbe med Mundal

Runar Skaug Mathisen gler seg til ny sesong og til å bli trena av Steinar Mundal.

Steinar Mundal går frå skiskyttarlandslaget til Team Telemark, og blir en del av trenerteamet til det hardtsatsande profflaget. 

– Eg gler meg til dette prosjektet. Det er mange spennande løparar i laget, og eg ser fram til å bruke erfaringa mi på å utvikle dei vidare, seier Mundal, som nå får ansvaret for mellom andre vinbyggjen Runar Skaug Mathisen, Mikael Gunnulfsen og Karstein Johaug. 

Trivsel og samhald

Mundal har dei siste sesongane trena Tiril Eckhoff og resten av skiskyttarjentene, men avslutta engasjementet etter at kontrakten gjekk ut tidlegare i vår. 

– Me er sjølvsagt veldig fornøgde med at Steinar takka ja til å bli å bli med oss i Team Telemark. Han blir med på rundt 40 samlingsdøgn fram mot sesongstart, følger opp løparane mellom treningssamlingane, og vil også vera med oss på konkurransar gjennom vinteren, seier teamsjef Hans Kristian Lahus. 

– Det er få trenarar som matchar Steinar sin rutine og kunnskap, og me ser fram til at han nå skal bruke denne på våre løparar og vårt team. I tillegg er Steinar spesielt dyktig til å skape gode miljø prega av trivsel og samhald, noko me vektlegg tungt, fortel Lahus. 

Runar Skaug Mathisen har dei siste sesongane tatt store steg som skiløpar, og har i fleire renn utfordra verdseliten. Han har alt fått eit solid inntrykk av Mundal, og ser frem til å arbeide tett med trenarveteranen framover. 

– Alle veit at Steinar Mundal er blant verdas aller beste trenarar. At han vel å kome til oss i Team Telemark er fantastisk. Nå har me alle moglegheiter for å utvikle oss vidare, seier Skaug Mathisen. 

Kjenner Telemark

Steinar Mundal har ei lang og innhaldsrik karriere bak seg som trenar. Han har vore landslagstrenar i fleire periodar for det norske herrelandslaget, og har også trena det canadiske landslaget. Dei siste sesongane har han altså trena damelandslaget i skiskyting. Han gler seg til å arbeide i Telemark. 

– Eg er godt kjent i Telemark. Det at Team Telemark har alle sine treningssamlingar i dette flotte fylket var ein del av grunnen til at eg takka ja til tilbodet. I tillegg er teamet godt og profesjonelt organisert. Me har nå gjennomført vår første treningssamling i Kragerø, og eg ser at potensialet i dette laget er stort. Eg er sikker på at mange løparar kjem til å gå fort til vinteren, mellom anna Runar Skaug Mathisen, seier Mundal. 

Då Team Telemark sist veke presenterte laget for komande sesong, var den profilerte trenerveteranen ein av to store nyheiter. Den andre var at laget igjen satsar tungt på damesida med fem nye løparar. Damelaget har en ung profil, der tre av løparane er førsteårs seniorar. 

Stort trenerteam 

Team Telemark blei i fjor trena av Jarle Ausland og raulendingen Jostein Vinjerui. Sistnemnte kombinerte jobben i privatlaget med trenarjobb i Storbritannia. Vinjerui blir med vidare i Team Telemark, men ikkje i ei rein trenarrolle. Ausland held fram, inn i trenerteamet kjem også Sondre Eriksen, som kjenner Telemark godt etter å ha tatt trenarutdanninga på Høgskulen i Bø.

Runar Skaug Mathisen blir denne sesongen einaste vesttelen blant løparane. Både Ånund og Torgeir Lid Byggland har lagt langrennsskia på hylla. Marianne Hermansen frå IL Rein var aktuell for laget, men etter ynske frå Telemark og Vestfold sitt krinslag skal ho gå der neste sesong. Her ville miljøet på damesida blitt for lite utan Hermansen. Krinslaget og Team Telemark samarbeider, og dei beste frå krinslaget vil kvalifisere seg for profflaget. 

– Om Marianne held fram utviklinga er ho ein naturleg kandidat for å gå for Team Telemark, seier Lahus.  

Neste samling blir lagt til Fyresdal. Her skal Team Telemark mellom anna delta i Sparsprinten 16. og 17. juni. Veka før skal dei ha fellesopplegg med eit anna langrennslag: Team Veidekke Vest der fyresdølen Eivind Arne Bjaaland er trenar. 

– Sjølv om Runar er den einaste vesttelen på laget nå er Vest-Telemark viktig for oss, seier Lahus.

Han viser til at dei både har mange treningssamlingar der, smørebuss-samarbeid på Rauland, og renn som Helterennet og Haukelirennet.