Endå ein ordførar går for fire år til
Nissedalordførar Halvor Homme stiller likevel opp til ny valperiode neste haust. Han er den tredje Ap-ordføraren i Vest-Telemark som vil halde fram i politikken.
Ein spørjerunde VTB hadde i mars til ordførarane i Vest-Telemark om den politiske framtida etter denne valperioden, viste at Fyresdal-ordførar Erik Skjervagen (Ap) og Kviteseid-ordførar Tarjei Gjelstad (Ap) går for ein ny periode. Om det også er andre ordførarar i regionen som vil fortsette i politikken, fekk me ikkje svar på då.
Halvor Homme er i sin andre periode på rad som ordførar. Han gav for ei tid tilbake signal om å seie nei til ein ny periode i politikken.
Artikkelen held fram under annonsen.
– Prinsipielt meiner eg at ein ikkje skal gro fast i eit ordførarverv. Eg trur det er lurt å byte ordførar med jamne mellomrom, sa han i mars, utan å påstå at to periodar er grensa.
Det hadde på den tida blitt klart at eit ynske frå Homme ikkje blir ein realitet.
– Eg såg ein klar etterfylgjar i gruppeleiar og formannskapsmedlem Runa Vee Tveit, men det viser seg at det ikkje er aktuelt for henne å halde fram i politikken, sa Homme.
Etter denne avklaringa måtte Homme gå i tenkeboksen. På eit spørsmål frå VTB sist tysdag stadfestar han at det er tatt ei avgjerd. Partiet hans har spurd Homme om å fortsette i politikken. Då det altså er klart at ei partifelle ikkje er aktuell som ordførarkandidat, har Homme nå sagt ja til å stå på topplassen.