Den sakna mannen er anteke omkomen

Politiet fekk melding om at ein person hadde falt over bord då to båtar kolliderte på Fyresvatn natt til sundag. Mannen i 20-åra er framleis sakna.

Politiet blei varsla om hendinga 02.20 natt til sundag, og det vart satt i gang søk med båt og luftambulanse. 

Måndag føremiddag har søket endra seg frå å prøve å finne den unge mannen i live, til å dreie seg om søk etter ein som antakeleg er omkomen.

– No ventar me berre på ein sonar. Den skal kome så fort som råd, seier rådmann Ketil Kiland. 

I heile går var det to båtar ute på Fyresvatn og leita. Dei tok til att i dag tidleg. I går og i natt har lokalmiljøet samla seg på Meinstad og i kyrkja, der dei har hatt tilgang på sjukepleiarar, lege, diakon og prest. 

– Me har hatt kriseteam tilgjengeleg i bygda heile natta. Akuttfasen, altså dagen i går, var då det var mest i bruk. Elles så er det etablert kontaktar gjennom kriseteamet folk som ønskjer det kan ta kontakt med, seier Kiland.

Rådmannen opplyser at det Ikkje er mange som er samla no i dag, men at alle ventar på meir informasjon. 

Han vil også takke alle som har stilt opp som leitemannskap. 

– Eg må få kyte av alle som har vore med og leita, både friviljuge og organisasjonar. Sjølve redningsarbeidet og samarbeidet mellom Røde kors og politiet har fungert veldig bra så langt, seier Kiland.